Donald Trump : अमेरिकेने केलेल्या इराणच्या नाकाबंदीमध्ये आल्यास ओमानवरही बॉम्ब हल्ला केला जाईल,अशी दमकी अमेरिकेचे अध्यक्ष डोनाल्ड ट्रम्प   यांनी दिली आहे. अमेरिकेने केलेल्या नाकाबंदीमुळे इराणवर दबाव येतो आहे.

एक दिवस इराणला माघार घ्यावी लागेल, असे ते म्हणाले. मात्र हा संघर्ष नक्की कधी समाप्त होईल याची कोणतीही निश्‍चित कालमर्यादा त्यांनी सांगितली नाही. एका वृत्तवाहिनीला दिलेल्या मुलाखतीमध्ये ट्रम्प (Donald Trump) यांनी ओमानला ही धमकी दिली. होर्मुझच्या व्यवस्थापनाबाबत इराण आणि ओमानमधील करार जवळपास निश्‍चित झाला असतानाच ट्रम्प यांनी ही धमकी दिली आहे.

इराण-ओमानमधील करारानुसार होर्मुझमधून जाणारी जहाजे एका बाजूने आणि येणारी जहाजे दुसऱ्या बाजूने प्रवास करण्याचे प्रयोजन आहे. या जहाजांवर इराणकडून शुल्क आकारले जाऊ शकते. म्हणून अमेरिकेकडून या द्विपक्षीय कराराला विरोध केला जातो आहे.

ऑक्टोबर महिन्यातील हंगामी युद्धविराम कराराची ६० दिवसांची मुदत आज संपते आहे. या कालावधीमध्ये अमेरिका-इराणमधील चर्चा पुर्ण होणे अपेक्षित होते. पण तशी चर्चा झालेली नाही. वाटाघाटी या इराणच्या अणू कार्यक्रमाबाबत व्हायला हव्या होत्या. कारण या मोहिमेचे मुख्य उद्दिष्ट इराणकडे अणूबॉम्ब असता कामा नये, हेच होते. त्यामुळे याविषयी कोणतीही जडजोड केली जाणार नाही, असेही ट्रम्प यांनी सोशल मीडियावरच्या पोस्टमध्ये म्हटले आहे.

होर्मुझवर लवकरच अमेरिकेची मालकी
अमेरिकेने आतापर्यंत इराणवर कठोर प्रहार केले आहेत. जर आवश्‍यकता भासल्यास अमेरिका यापेक्षाही अधिक मोठा प्रहार इराणवर करेल. तो प्रहार झेलण्याची इराणची क्षमता आता उरलेली नाही. इराणचे नेतृत्व संपले आहे. इराणचे नौदल आणि हवाई दल देखील आता संपले आहे. इराणला आज नाही, तर उद्या शरण यावेच लागणार आहे.

भविष्यात इराणवर अमेरिकेच्या मोठ्या कारवाईसाठी नागरिकांनी सज्ज रहावे. होर्मुझच्या सामुद्रधुनीवर अमेरिकेचे (Donald Trump) पुर्ण नियंत्रण असल्याचे ट्रम्प यांनी म्हटले होते. दोन दिवसांपुर्वी ट्रम्प यांनी होर्मुझची सामुद्रधुनी लवकरच अमेरिकेच्या मालकीची होईल, असेही म्हटले होते. त्यामुळे अमेरिका लवकरच मोठी कारवाई करणार असल्याचे संकेत देखील मिळाले आहेत.

अमेरिकेच्या सैनिकावर इराणकडून बक्षिस
अमेरिकेच्या प्रत्येक सैनिकाला ठार मारणाऱ्या इराणी सैनिकाला ३० हजार डॉलरचे बक्षिस दिले जाईल, असे इराणचे लष्कर प्रमुख मेजर जनरल आमिर हातमी यांनी जाहीर केले आहे. जर अमेरिकेच्या सैनिकाला मारण्याची कामगिरी इराणच्या लष्करातील महिलेने केल्यास बक्षिसाची रक्कम दुप्पट होईल, असेही हातमी यांनी म्हटले आहे.

अमेरिका आणि इस्रायल त्यांची युद्धाची उद्दिष्ट्ये पूर्ण करण्यात अयशस्वी ठरले आहेत. इराणचे आत्मसमर्पण, सत्तापालट, अण्वस्त्रे मागे घेणे आणि सशस्त्र गटांना दिलेला अप्रत्यक्ष पाठिंबा संपुष्टात आणणे ही ट्रम्प (Donald Trump) प्रशासनाची घोषित उद्दिष्ट्ये अजूनही साध्य झालेली नाहीत, असे संसद अध्यक्ष गालिबाफ म्हणाले.