Osama bin Laden : आम्ही अल-कायदाचा म्होरक्या ओसामा बिन लादेनला (Osama bin Laden) शोधून मारले, असे अमेरिकेने शनिवारी संयुक्त राष्ट्राच्या सुरक्षा परिषदेत सांगितले. संयुक्त राष्ट्राच्या सुरक्षा परिषदेने ११ सप्टेंबरच्या भीषण दहशतवादी हल्ल्याच्या २५ व्या स्मृतिदिनानिमित्ताने पाच वर्षात पहिल्यांदाच दहशतवादाविरोधात अध्यक्षीय निवेदन प्रसिद्धीस दिले आहे.

२००१ मध्ये अल-कायदाच्या दहशतवाद्यांनी अपहरण केलेली विमाने वर्ल्ड ट्रेड सेंटरच्या दोन इमारतींवर आदळवून केलेल्या ९/११ च्या हल्ल्याच्या २५ व्या वर्षपूर्तीनिमित्त संयुक्त राष्ट्र सुरक्षा परिषदेने शुक्रवारी एक पत्रकार परिषद आयोजित केली होती. त्यावेळी दिलेल्या निवेदनात अमेरिकेने दिलेली माहिती देण्यात आली आहे. एकत्र येऊन आम्ही बिन लादेनला (Osama bin Laden) शोधून काढले.

आमच्या आघाडीने आयसिसची खिलाफत उद्ध्वस्त केली. आम्ही अल-बगदादी आणि अल-जवाहिरी यांना ठार मारले, असे संयुक्त राष्ट्रातील अमेरिकेचे राजदूत माईक वॉल्ट्झ यांनी दहशतवादी गटांच्या नेत्यांचा उल्लेख करत सांगितले. दहशतवादी कृत्यांमुळे आंतरराष्ट्रीय शांतता आणि सुरक्षेला निर्माण झालेले धोके या शीर्षकाच्या सुरक्षा परिषदेच्या बैठकीत बोलताना त्यांनी ही टिप्पणी केली.

अस्थायी सदस्य या नात्याने पाकिस्तान सध्या सुरक्षा परिषदेचा सदस्य आहे. पाकिस्तानची दोन वर्षांची मुदत डिसेंबर अखेरीस संपणार आहे. पाकिस्तानच्या सदस्याच्या उपस्थितीतच अमेरिकेने या कारवाईची माहिती दिली. ९/११ चे दहशतवादी हल्ले बिन लादेनने घडवून आणले होते, तो पाकिस्तानच्या एबोटाबाद शहरात लपून बसला होता आणि मे २०११ मध्ये अमेरिकेच्या नेव्ही सील्सनी एका छाप्यात त्याला ठार केल्याचे वॉल्टझ यांनी सांगितले.

सुरक्षा परिषदेचे सदस्य असलेल्या १५ देशांमधील दहशतवादी हल्ल्यांची यादीच वॉल्टझ यांनी यावेळी सादर केली. लॅटवियापासून लायबेरियापर्यंत सर्वत्र दहशतवादी हल्ल्यात निरपराध लोक मारले गेले आहेत. पाकिस्तानमधील २०१४ च्या पेशावर शाळेतील हत्याकांडात सुमारे १३० मुलांचा मृत्यू झाला आणि ७ जुलै २००५ च्या लंडन बॉम्बस्फोटांचाही त्यांनी उल्लेख केला.

न्यूयॉर्क, अर्लिंग्टन (व्हर्जिनिया) आणि पेनसिल्व्हेनिया येथील ९/११ च्या दहशतवादी हल्ल्यांचा स्पष्ट निषेधदेखील सुरक्षा परिषदेने आपल्या निवेदनात करण्यात आला.

सर्व प्रकारच्या दहशतवादाचा निषेध…
या निवेदनात (Osama bin Laden) दहशतवादाची सर्व कृत्ये, पद्धती आणि प्रथा, त्यांची प्रेरणा काहीही असो, ती कोठेही, केव्हाही आणि कोणीही केली असली तरी, त्यांच्या सर्व स्वरूपांमध्ये आणि आविष्कारांमध्ये गुन्हेगारी आणि असमर्थनीय म्हणून निषेध केला गेला.

तसेच आंतरराष्ट्रीय दहशतवादाची कृत्ये ही संयुक्त राष्ट्रसंघाच्या सनदेच्या उद्दिष्टांच्या आणि तत्त्वांच्या विरुद्ध आहेत, त्याचप्रमाणे त्यासाठीचा वित्तपुरवठा, नियोजन आणि तयारी, तसेच त्याला दिला जाणारा इतर कोणत्याही प्रकारच्या पाठिंब्याला देखील सुरक्षा परिषदेचा विरोध असल्यावर जोर देण्यात आला.