Ajit Pawar On Manikrao Kokate : विधान भवनात ऑनलाइन रम्मी खेळताना आढळलेले कृषिमंत्री माणिकराव कोकाटे यांच्या कृतीने शेतकऱ्यांमध्ये आणि विरोधकांमध्ये तीव्र संताप निर्माण झाला होता. राष्ट्रवादी काँग्रेस (शरद पवार गट) नेते रोहित पवार यांनी हा व्हिडिओ व्हायरल करत कोकाटे यांच्या बेजबाबदार वर्तनावर बोट ठेवले होते. यानंतर विरोधकांनी कोकाटे यांच्या राजीनाम्याची मागणी लावून धरली.

अखेर सरकारने कोकाटे यांच्याकडून कृषिमंत्रिपद काढून घेत त्यांना क्रीडा आणि युवक कल्याण खाते सोपवले, तर अजित पवारांचे विश्वासू सहकारी दत्तात्रय भरणे यांना नवे कृषिमंत्री बनवण्यात आले आहे.

दरम्यान, माणिकराव कोकाटेंच्या विधानावरुन मुख्यमंत्री देवेंद्र फडणवीस यांनी देखील नाराजी व्यक्त केली होती. त्यामुळे देवेंद्र फडणवीस माणिकराव कोकाटेंचा राजीनामा घेणार असल्याची शक्यता वर्तवण्यात येत होती.

फडणवीसांना श्रेय मिळू नये म्हणून अजित पवारांची मोठी खेळी

मात्र, माणिकराव कोकाटेंबाबत देवेंद्र फडणवीसांना श्रेय मिळू नये म्हणून अजित पवारांनी स्वत:च त्यांची उचलबांगडी केली आहे. तसेच धनंजय मुंडेंच्या मंत्रिपदाचा राजीनामा देवेंद्र फडणवीसांनी परस्पर घेतल्याचे चित्र निर्माण झाले होते. त्यामुळे अजित पवारांनी माणिकराव कोकाटेंचं खातं बदललं ती चूक टाळल्याची राजकीय वर्तुळात चर्चा जोर धरू लागली आहे.

कृषिमंत्रिपद दत्तात्रय भरणेंसाठी लॉटरी

क्रीडा आणि युवक खातं मिळाल्याने अजित पवारांचे विश्वासू असलेलेल दत्तात्रय भरणे हे नाराज असल्याची चर्चा होती. दत्तात्रय भरणेंनी खातेवाटपानंतर ही नाराजी उघडही केली होती. मात्र, आता कोकाटेंवरील कारवाई ही दत्तात्रय भरणेंसाठी एक लॉटरी ठरली आहे.

कृषिखात्यासारख्या महत्त्वाच्या खात्यावरील वर्णी ही दत्तात्रय भरणेंसाठी लॉटरीच मानली जात आहे. एकीकडे माणिकराव कोकाटेंचा खातेपालट करत अजित पवारांनी कारवाई केल्याचं दाखवलं. तर दुसरीकडे विश्वासू दत्ता भरणेंना कृषिखातं देत त्यांच्या नाराजीवरही अक्सीर इलाज केल्याचं बोललं जात आहे.