काही दिवसांपूर्वी अजित पवार यांनी मुख्यमंत्रिपदाबाबत केलेल्या वक्तव्याची चर्चा संपूर्ण राज्यात रंगली होती. मलाही अनेक वर्षांपासून मुख्यमंत्री व्हावं वाटतं, पण योग येत नाहीये, असं अजित पवार हसत-हसत म्हणाले होते. यादरम्यान आता नांदेडचे माजी खासदार भास्करराव पाटील खातगावकर यांनी अजित पवारांबाबत एक मोठे भाकीत केले आहे.

काय म्हणाले भास्करराव पाटील खातगावकर?
नांदेडमध्ये राष्ट्रवादी पक्षाचा एक कार्यक्रम आयोजित करण्यात आला होता. या कार्यक्रमात भास्करराव म्हणाले “दादा माझं भाकीत खरं होतं. मी अशोक चव्हाण यांना म्हटलं होतं तुम्ही मुख्यमंत्री व्हाल ते मुख्यमंत्री झाले. दिल्लीच्या सेंट्रल हॉलमध्ये राजकीय चर्चा होते. तिथे अशी चर्चा आहे की येत्या वर्ष-दीड वर्षात देवेंद्र फडणीस दिल्लीला जातील आणि तुम्ही मुख्यमंत्री व्हाल,” तसेच मुख्यमंत्री झाल्यानंतर तुम्ही नांदेडमध्ये सत्कार घ्यावा अशी विनंतीदेखील खतगावकर यांनी अजित पवारांना केली.

काही दिवसांपूर्वी अजित पवार यांनी मुख्यमंत्रिपदाविषयी विधान केल्यानंतर राजकीय वर्तुळात अनेक चर्चा रंगल्या. विरोधकांनी तर त्यांना महाविकास आघाडीत येण्याची ऑफर दिली. अजितदादा जोपर्यंत भाजपासोबत आहेत, तोपर्यंत त्यांची मुख्यमंत्री होण्याची इच्छा पूर्ण होऊ शकणार नाही. त्यामुळे त्यांनी महाविकास आघाडीत यावे. त्यांची मुख्यमंत्री होण्याची इच्छा पूर्ण होईल, अशी थेट ऑफर ठाकरे गटाचे नेते विनायक राऊत यांनी दिली होती.