Ajit Pawar : राज्याचे उपमुख्यमंत्री आणि पुणे जिल्ह्याचे पालकमंत्री अजित पवार हे त्यांच्या पहाटेपासूनच कामाला सुरूवात करतात, याची प्रचिती अनेकदा दिसून आली आहे. आज सकाळी अजित पवार यांनी पुण्यातील आयटी हब म्हणून ओळखल्या जाणाऱ्या हिंजवडीला भेट दिली. पहाटे सहा वाजेपासून अजित पवारांनी हिंजवडीतील विविध समस्या सोडवण्यासाठी रस्त्यावर उतरले. येथील अनेक भागांची पाहणी करत तेथील समस्या जाणून घेत सबंधित अधिकाऱ्यांना उपाययोजना करण्याचे आदेश दिले.

या भागात पावसाचे साचणारे पाणी, रस्त्याची समस्या, वाहतूक कोंडी आदी समस्यांवर तातडीने उपाययोजना करण्याचे त्यांनी सबंधित विभागाच्या अधिकाऱ्यांना सूचना केल्या. अतिक्रम करण्यात आलेल्या ठिकाणीची त्यांनी पाहणी केली. यावेळी सरकारी रस्ता अडवणाऱ्या व्यक्तींवर सरकारी कामात अडथळा आणल्या प्रकरणी कारवाई करत गुन्हा दाखल करण्याचे स्पष्ट निर्देश अजित पवारांनी संबंधित प्रशासनाला दिले.

पावसाळ्यात हिंजवडी भागात अनेक ठिकाणी पाणी साठत असते. पावसाला सुरुवात झाल्यानंतर अवघ्या काही वेळात वॅाटर पार्कसारखी परिस्थिती होते. त्या भागाची देखील अजित पवार यांनी पाहणी केली. यावेळी स्थानिकांनी दोन मोठे प्रकल्प आणि एक कंपनी यांनी मिळून एक मोठा नाला बुजविल्याचे सांगितले. यामुळे आता याप्रकरणी काही कारवाई होणार का हे पाहावे  लागणार आहे.

पुण्यातील मेट्रो लाईन तीन हिंजवडीची पाहणी अजित पवारांनी केली. प्रस्तावित मेट्रोच्या जिन्याला पर्यायी जिना तयार करा आणि तो रस्त्याच्या बाजूला घ्या, अशा सूचना मेट्रो प्रशासनावर त्यांनी दिल्या.

हेही वाचा :Pune : महापालिकेला सरकारचा धक्का ! जाहिरातशुल्क दरवाढीचा प्रस्ताव निलंबित