Ajit Pawar in Parli : राज्याचे उपमुख्यमंत्री आणि बीडचे पालकमंत्री अजित पवार सोमवारी बीड जिल्हा दौऱ्यासाठी दाखल झाले आहेत. उपमुख्यमंत्री अजित पवार हे बीडचे पालकमंत्री झाल्यानंतर आज (19 मे) प्रथमच परळीच्या दौऱ्यावर आहेत. परळीतूनच त्यांनी या दौऱ्याची सुरुवात केली.

परळीतील विविध विकास कामे आणि महत्वपूर्ण बैठका आणि बीड (Beed) जिल्ह्यातील वाढती गुन्हेगारीच्या पार्श्वभूमीवर या दौऱ्याला विशेष महत्व प्राप्त झाले आहे. अजित पवार यांनी वैद्यनाथाचे दर्शन घेऊन पुढील कार्यक्रमांना हजेरी लावली. यावेळी मंत्री पंकजा मुंडे आणि परळीचे आमदार धनंजय मुंडे हे देखील उपस्थित होते.

दरम्यान, अजित पवार यांनी विकास कामाची पाहणी केली असता त्यांनी एका कंत्राटदाराला धारेवर धरत खडे बोल सुनावले. बैद्यनाथ मंदिरांच्या पूर्वेला असणाऱ्या द्वारासमोरील पायऱ्याचे काम सुरू आहे. काम करणाऱ्या कॉन्ट्रॅक्टरला अजित पवारांनी पायऱ्याच्या कामाच्या दर्जावरून सुनावले आहे.

नेमकं काय घडलं?

अजित पवार परळीमध्ये आले असता ते तिथं बारा ज्योतिर्लिंगापैकी एक ज्योतिर्लिंग असणाऱ्या परळी वैद्यनाथ क्षेत्राच्या विकास आराखड्यासाठी बैठक घेणार होते. याचसाठी ते मंदिरापाशी पोहोचले आणि तिथं पायऱ्या चढून जाताना तिथलं काम व्यवस्थित नसल्याचं त्यांच्या लक्षात आलं आणि लगेचच त्यांनी कंत्राटदाराला फैलावर घेतलं.

असं काम माझ्यासोबत बिल्कुल चालणार नाही अशी तंबी त्यांनी कंत्राटदाराला दिली. आपण पुढच्या वेळी जेव्हा येथे येऊ तेव्हा असं काम दिसायला नको अन्यथा यावर कडक कारवाई केली जाईल, असा इशाराच अजित पवार यांनी दिला.

अजित पवारांच्या स्वागताला शंभर किलो फुलांचा हार

राज्याचे उपमुख्यमंत्री अजित पवार यांचे राष्ट्रवादी काँग्रेस पार्टी कडून त्यांचे जंगी स्वागत करण्यात आलं. या वेळी परळी शहरातील छत्रपती संभाजी महाराज चौक, राणी लक्ष्मीबाई टावर आणि वैद्यनाथ मंदिर परिसरामध्ये शंभर शंभर किलो फुलांचे हार क्रेनवर लावण्यात आले होते. तसेच त्यांच्या आगमनानंतर राष्ट्रवादी कार्यकर्त्यांनी फटाक्यांसह फुलांची उधळणही केल्याचं पाहायला मिळालं.