Ajit Pawar Funeral : राज्याचे लाडके दादा म्हणून ओळख असणारे महाराष्ट्राचे उपमुख्यमंत्री अजित पवार यांचे काल सकाळी विमान अपघातात निधन झाले. त्यांच्या जाण्याने राज्यासह देशही शोकसागरात बुडाला आहे.

दरम्यान, अजित पवार यांच्या निधनावर राजकीय वर्तुळातूनही हळहळ व्यक्त करण्यात येत आहे. त्यातच अजित पवारांचे जवळचे सहकारी माजी आमदार राजवर्धन कदमबांडे यांनी अजित पवारांनी त्यांना दिलेल्या सल्ल्याची आठवण सांगत आपले दुःख व्यक्त केले.

“राजवर्धन, शक्यतो छोट्या विमानाने प्रवास करू नकोस…” हे शब्द आजही कानात घुमत आहेत, असे सांगत माजी आमदार राजवर्धन कदमबांडे यांचा बांध फुटला. आपल्या सहकाऱ्यांवर मोठ्या भावासारखी माया करणारे दिवंगत अजित पवार नेहमीच सुरक्षिततेबाबत आग्रही असत. त्यांच्या त्या साध्या पण काळजीने भरलेल्या सल्ल्याची आठवण काढताना कदमबांडे यांना आपले अश्रू आवरणे कठीण झाले. Ajit Pawar Funeral :

अजित पवार जेव्हा धुळे दौऱ्यावर यायचे, तेव्हा ते हमखास राजवर्धन कदमबांडे यांच्या घरी जेवायला थांबत असत. अशाच एका निवांत क्षणी त्यांनी राजवर्धन यांना प्रवासाबाबत सावध राहण्याचा सल्ला दिला होता. “सुरक्षिततेच्या दृष्टीने छोट्या विमानाने प्रवास टाळलेलाच बरा. मी स्वतःही शक्यतो असा प्रवास करत नाही,” असे त्यांनी स्पष्टपणे सांगितले होते.

मात्र नियतीचा खेळ किती विचित्र असतो, याचे हे दुर्दैवी उदाहरण ठरले. इतरांना सावध करणारे, धोका ओळखणारे आणि सुरक्षिततेवर भर देणारे अजित पवार अखेर त्याच छोट्या विमानाच्या प्रवासात आपल्यातून निघून गेले. ज्या संकटाची त्यांना भीती वाटत होती, त्याच संकटाने महाराष्ट्राच्या एका कणखर, अनुभवी आणि प्रभावी नेतृत्वाचा प्रवास अचानक थांबवला.  Ajit Pawar Funeral :

दरम्यान, दिवंगत अजित पवार यांच्यावर आज बारामती येथील विद्या प्रतिष्ठानच्या मैदानावर शासकीय इतमामात अंत्यसंस्कार करण्यात येणार आहेत. त्यांच्या निधनाची बातमी समजताच राज्य सरकारकडून तीन दिवसांचा शासकीय दुखवटा जाहीर करण्यात आला आहे.