Ajinkya Deo recounts the shocking details of the accident : गणेशोत्सवाच्या पार्श्वभूमीवर मनोरंजनसृष्टीतील अनेक कलाकारांच्या घरी गणपती बाप्पाचे आगमन झाले आहे. यानिमित्ताने कलाकारांच्या गणपतीविषयीच्या श्रद्धा, आठवणी आणि आयुष्यात आलेले अनुभव जाणून घेण्यासाठी त्यांच्या मुलाखती घेतल्या जात आहेत. अशाच एका मुलाखतीत अभिनेते अजिंक्य देव यांनी त्यांच्या आयुष्यातील एका धक्कादायक प्रसंगाचा खुलासा केला आहे.

अजिंक्य देव यांनी नुकतीच एका न्यूज चॅनेलला मुलाखत दिली. यावेळी त्यांनी २००४ मध्ये झालेल्या भीषण अपघाताची आठवण सांगितली. या अपघातानंतर ते तब्बल पाच दिवस कोमात होते. त्यांच्या डोक्याला गंभीर दुखापत झाली होती आणि यामुळे ऑपरेशन करण्यात आलं होतं. मात्र, या कठीण प्रसंगातून ते सुखरूप बाहेर पडल्याचं श्रेय त्यांनी गणपती बाप्पाच्या कृपेला दिलं.

अजिंक्य देव म्हणाले, “मला बाप्पाचे अनेक अनुभव आले आहेत. आज मी सगळ्यांसोबत चांगल्या स्थितीत आहे, ती फक्त गणरायाची कृपा आहे. २००४ मध्ये माझा वर्सोवा येथे भयानक अपघात झाला होता. मला काहीच कळत नव्हतं. मी तब्बल पाच दिवस कोमात होतो. माझ्या डोक्याला खूप मार लागला होता आणि ऑपरेशन करावं लागलं होतं. मात्र, अपघातानंतर २० व्या दिवशीच मी शूटिंग करत होतो. हा माझ्यासाठी मोठा चमत्कार आहे.”

अपघाताच्या वेळी मदतीला धावून आलेल्या तीन व्यक्तींविषयी बोलताना अजिंक्य देव म्हणाले की, त्या तिघांनी त्यांना वाचवण्यासाठी मोठी मदत केली. विशेष म्हणजे, त्या तिघांची नावं तीन वेगवेगळ्या धर्मांशी संबंधित होती. ते कधीच मला त्यानंतर भेटले नाहीत. त्यामुळे निःस्वार्थपणे बाप्पावर श्रद्धा ठेवली पाहिजे.

दरम्यान, अजिंक्य देव यांच्या आगामी कामाचीही सध्या चर्चा आहे. बॅालिवूड अभिनेता रणबीर कपूर मुख्य भूमिकेत असलेल्या ‘रामायण’ या सिनेमात ते झळकणार आहेत. या सिनेमात ते कोणती भूमिका साकारणार आहे याविषयीचा अधिकृत तपशील समोर आलेला नाही. मराठी मनोरंजनसृष्टीत त्यांनी अनेक सिनेमात काम केलं असून आपल्या अभिनयाच्या जोरावर त्यांनी स्वतंत्र ओळख निर्माण केली आहे. सोशल मीडियावरही ते सक्रिय असतात.

Satara: ग्रामीण भागात प्रभावी बँकिंग सेवा द्यावी, जिल्हाधिकारी संतोष पाटील; बँक ऑफ महाराष्ट्रच्या नूतन इमारतीचे उद्घाटन