Air India Plane Crash । Dilip Lande – उपमुख्यमंत्री एकनाथ शिंदे यांच्या नेतृत्वातील सत्ताधारी शिवसेनेचे आमदार दिलीप लांडे यांनी अहमदाबादसारखी विमान दुर्घटना मुंबईत झाली तर त्यात मोठी जीवितहानी होण्याची भीती व्यक्त केली आहे. यासाठी त्यांनी मुंबई विमानतळाच्या शेजारी असणाऱ्या कुर्ला बैल बाजार झोपडपट्टीतील लोकसंख्येचा दाखला दिला आहे. गुजरातच्या अहमदाबादमधील अपघातात विमानाचे पायलट सुमित सभरवाल यांचाही समावेश आहे. सभरवाल मुंबईच्या पवई भागात राहत होते. आमदार दिलीप लांडे यांनी शुक्रवारी त्यांच्या कुटुंबीयांची भेट घेतली. त्यानंतर पत्रकारांशी बोलताना त्यांनी उपरोक्त भीती व्यक्त केली. आमदार लांडे म्हणाले की, कुर्ला बैल बाजार झोपडपट्टी मुंबई विमानतळाच्या अगदी जवळ आहे. या ठिकाणावरून विमाने अत्यंत कमी उंचीवरून उड्डाण भरत असतात. त्यामुळे इथे एखादी दुर्घटना घडली तर त्यात मोठी जीवितहानी होऊ शकते. त्यामुळे या प्रकरणी योग्य ती काळजी घेण्याची गरज आहे. हा प्रश्न मी विधानसभेच्या पटलावरही उपस्थित केला होता. तेव्हा मला एकनाथ शिंदे साहेबांनी आश्वासन दिले होते. आता पुन्हा मी या प्रकरणी मुख्यमंत्री देवेंद्र फडणवीस व उपमुख्यमंत्री एकनाथ शिंदे यांना निवेदन देणार आहे. ही झोपडपट्टी मुंबई विमानतळ परिसरातून लवकरात लवकर हटवली पाहिजे. राज्य सरकारसह केंद्रानेही यासंबंधी योग्य ती कारवाई केली पाहिजे, असे ते म्हणाले.
