कर्जत/जामखेड(अहमदनगर) – कोरोनाच्या दुसऱ्या लाटेत राज्यासह देशात ऑक्सिजन तुटवड्यामुळे सर्वच यंत्रणांना तारेवरची कसरत करावी लागत होती. या अडचणीच्या काळात दोन्ही तालुक्यात ऑक्सीजनचा तुटवडा होणार नाही याची सर्वतोपरी काळजी आमदार रोहित पवार यांनी घेतली. कुठल्याही परिस्थितीत आ. रोहित पवार यांनी आपल्या मतदारसंघातील रुग्णांसाठी ऑक्सिजन कमी पडू दिला नाही.

दरम्यान दुर्दैवाने तिसरी लाट आल्यास ऑक्सिजनची कमतरता भासू नये यासाठी पूर्वनियोजन करून रोहित पवार यांच्या संकल्पनेतून व पुढाकारातून कर्जत जामखेड तालुक्यात ऑक्सिजन निर्मिती प्रकल्प उभारण्यात येत आहेत. या प्रकल्पांना जिल्हा प्रशासनामार्फत मंजुरी मिळाली असून कर्जत व जामखेड तालुके ऑक्सिजन निर्मितीत आता स्वयंपूर्ण होणार आहेत व नगर जिल्ह्यातील ऑक्सिजन हब म्हणून आता हे दोन्ही तालुके नावारूपास येणार आहेत.

कोरोनाच्या पहिल्या लाटेपासून वाढते संक्रमण रोखण्यासाठी विविध प्रभावी व नाविन्यपूर्ण उपाययोजना कर्जत जामखेडचे आ. रोहित पवार राबवत आहेत. कर्जत व जामखेड या दोन्ही ठिकाणी सुसज्ज जम्बो कोविड सेंटर उभारून रुग्णांना चांगल्याप्रकारे आरोग्य सुविधा पुरवण्यास आ. रोहित पवार कटिबध्द राहिलेले आहेत. परिणामी कर्जत जामखेडसह आजूबाजूच्या तालुक्यातील रुग्णही या ठिकाणी येऊन उपचार घेत आहेत.

“कोरोनाच्या या दुस-या लाटेत ऑक्सीजनच्या कमरतेमुळे सर्वच वैद्यकीय यंत्रणांना ऑक्सीजन मिळवण्यासाठी तारेवरची कसरत करावी लागली. येत्या काळात कर्जत व जामखेड तालुक्यासाठी मुबलक प्रमाणात ऑक्सीजनचा पुरवठा व्हावा या नियोजनातून कर्जत जामखेडमध्ये ऑक्सीजन निर्मिती प्रकल्प उभारण्यात येत आहेत. यासाठी पालकमंत्री हसन मुश्रीफ, अहमदनर जिल्हा प्रशासन व महाविकास आघाडीचे आभार.
–  रोहित पवार(आमदार, कर्जत/जामखेड)

रुग्णांना कोणत्याही समस्येला सामोरे जावे लागू नये हाच अट्टहास असलेल्या रोहित पवारांनी एक लोकप्रतिनिधी म्हणून आणखी एक मोलाची कामगिरी बजावत कर्जत व जामखेडकरांची मने जिंकलेली आहेत. रोहित पवार यांच्या पुढाकारातून कर्जत व जामखेडमध्ये ऑक्सिजन निर्मिती प्रकल्प उभारण्यात येत आहेत. जिल्हा नियोजन मंडळाच्या माध्यमातून या ऑक्सिजन निर्मिती प्रकल्पाचे कार्यारंभ आदेश देण्यात आले असून कर्जत येथील ऑक्सिजन निर्मिती प्रकल्पाच्या बांधकामास सुरुवात देखील झाली आहे.

कोरोनाच्या या दुस-या लाटेत जेव्हा जेव्हा ऑक्सिजनची गरज भासली त्या त्यावेळेस शासकीय व खासगी यंत्रणांना ऑक्सिजन मिळवण्यासाठी तारेवरची कसरत करावी लागली. मात्र रोहित पवार यांनी ऑक्सिजनची ही उणीव आपल्या कर्जत जामखेडमधील रुग्णांना कदापी भासू दिली नाही. दरम्यान भविष्यातील दृष्टीकोनातून कर्जत जामखेडमध्ये उपचार घेणा-या रुग्णांना मुबलक प्रमाणात ऑक्सिजनचा पुरवठा व्हावा याकरिता कर्जत व जामखेडमध्ये हे ऑक्सिजन निर्मिती प्रकल्प उभारण्यात येत आहेत.

याद्वारे कर्जतमध्ये १२०० एलपीएम व जामखेडमध्ये ६५० एलपीएम ऑक्सिजन निर्मिती होणार असून या प्रकल्पातून कर्जत येथे २५० तर जामखेड येथे १२५ ऑक्सिजन सिलेंडर प्रति दिवशी भरले जाणार आहेत. हवेतून ऑक्सिजन संकलित करून त्याद्वारे द्रवरुप ऑक्सिजनची निर्मिती या प्रकल्पात होणार आहे.

या प्रकल्पामुळे कर्जत व जामखेड तालुके ऑक्सिजन निर्मितीत स्वयंपूर्ण होणार आहेत. त्याचबरोबर जिल्हा नियोजन समितीच्या माध्यमातून कर्जत येथे १८ केएल लिक्वीड ऑक्सिजन स्टोरेज टँकला देखील मंजुरी मिळाली असून त्याद्वारे ऑक्सिजन साठवणूक देखील करता येणार असल्याने यामुळे कर्जत उपजिल्हा रुग्णालयासह तालुक्यातील इतर कोणत्याही कोरोनाबाधित रुग्णाला व त्यांच्या नातेवाईकांना ऑक्सिजन सिलेंडर मिळवण्यासाठी तारेवारची कसरत करावी लागणार नाही.

कर्जत/जामखेडसह आजूबाजूच्या तालुक्यातील रुग्णांनाही आधार..

कर्जत जामखेडसह आजूबाजूच्या करमाळा, परांडा, भूम, दौंड, बीड, कडा व आष्टी या भागातून देखील अनेक कोरोनाबाधित रुग्ण हे उपचारासाठी कर्जत व जामखेड येथे  रोहित पवार यांच्या माध्यमातून उभारण्यात आलेल्या सुसज्ज जम्बो कोव्हीड सेंटरला प्राधान्य देतात. तेव्हा कर्जत व जामखेडमध्ये उपचारासाठी येणा-या रुग्णांचा आवाका लक्षात घेऊन आ. रोहित पवार यांनी सद्यपरिस्थितीत ऑक्सिजन निर्मिती प्रकल्प उभारण्यासाठी पाठपुरावा केल्याने सर्वच रुग्णांना मोठा आधार मिळाला आहे.