नवी दिल्ली : मागच्या काही दिवसांपासून देशात काही प्रेम कहाण्या सुरु झाल्या आहेत. प्रियकरासाठी प्रेयसी देशाच्या सीमा ओलांडत आहेत. सर्वात अगोदर पाकिस्तानी महिला सीमा हैदर आपल्या प्रेमासाठी भारतात आली त्यानंतर भारतीय अंजु पाकिस्तनात जाऊन फातिमा बनली. हे एवढं कमी होत कि काय म्हणून आता भारताची आणखी एक महिला आपल्या प्रेमासाठी घर संसार मुलंबाळं सोडून परदेशात निघून गेली असल्याचे सांगण्यात येत आहे. एका इंग्रजी वर्तमानपत्राने याविषयी माहिती दिली आहे.

राजस्थानमधील एक महिला तिच्या दोन मुलांना सोडून तिच्या प्रियकरासोबत कुवेतला पळाली असल्याचे सांगण्यात येत आहे. विशेष म्हणजे, या महिलेचा पती मुंबईत नोकरीनिमित्त राहत होता. याप्रकरणी पतीने पोलिसांत तक्रार दाखल केली आहे. हे प्रकरण राजस्थानच्या डूंगरपुर जिल्ह्यातील आहे. दीपिका पाटीदार नावाची महिला आपल्या दोन मुलांसोबत गावात राहत होती. मुलगी ११ वर्षांची असून मुलगा ७ वर्षांचा आहे. तर, पती नोकरीनिमित्त मुंबईत राहतो.

दीपिका तिच्या उपचारांसाठी सतत गुजरात आणि उदयपूरला जात होती. परंतु, १० जुलै रोजी ती गुजरातला गेली ती परत आलीच नाही. त्यासोबतच, तिचा आता बुरख्यातील एक फोटोही सोशल मीडियावर व्हायरल झाला आहे. मुबंई नोकरीनिमित्त राहणाऱ्या मुकेश पाटीदार याला तिने व्हॉट्सअॅप कॉल केला होता. तिने फोन करून सांगितले की तुम्ही माझ्यामुळे सतत दुःखी असता ना. त्यामुळे मी तुमच्यापासून लांब राहत आहे. असे ती फोनवर बोलली. यामुळे घाबरलेल्या पतीने तत्काळ राजस्थानमधील घर गाठले. परंतु, दीपिका तिथे नव्हती. त्याच्या घरातील दागिनेही जागेवर नव्हते. घरातून रोख रक्कमही गायब झाली होती. त्यामुळे पतीने पोलीस ठाण्यात धाव घेत तक्रार दाखल केली.

दीपिकाच्या पतीने तक्रार दाखल केल्यानंतर पोलिसांनी तपास सुरू केला. या तपासात पोलिसांना दुसराच अँगल समोर आला आहे. दीपिकाचा एक फोटो समोर आला आहे. या फोटोत तिने बुरखा घातलेला आहे. इरफान हैदर नावाच्या व्यक्तीसोबत ती पळून गेली असून तो गुजरातच्या हिम्मतनगर येथे राहणार आहे. तर, हे दोघेही आता कुवेत येथे असल्याचंही सांगण्यात येत आहे. दीपिकाचे ब्रेनवॉशिंग करण्यात आल्याचा दावा मुकेशने पत्रकारांसमोर केला आहे. याप्रकरणी पोलीस अधिक तपास करत आहेत, असेही पोलिसांनी सांगितले.