Eknath Shinde : गेल्या काही दिवसांत ठाकरे गटातील अनेक लोकप्रतिनिधींनी शिंदे गटाची वाट धरल्याने राजकीय समीकरणे झपाट्याने बदलत आहेत. उद्धव ठाकरेंचे सहा खासदार आणि विधानपरिषदेचे आमदार सचिन अहिर यांच्या पाठोपाठ आता शिक्षक आमदार किरण सरनाईक यांनीही उपमुख्यमंत्री एकनाथ शिंदे यांच्या नेतृत्वावर विश्वास व्यक्त करत शिवसेनेला (शिंदे गट) पाठिंबा जाहीर केला आहे. त्यामुळे ते शिवसेनेचे सहयोगी सदस्य झाले आहेत. त्यामुळे राज्यातील राजकीय घडामोडींना पुन्हा वेग आला असून विरोधी पक्षाला आणखी एक मोठा धक्का बसला आहे.

विशेष म्हणजे दोन दिवसांपूर्वी ठाकरे गटाचे विश्वासू मानले जाणारे सचिन अहिर यांनी शिंदे गटाच्या वतीने विधानपरिषदेच्या उपसभापतीपदासाठी अर्ज भरला होता. त्यानंतर त्यांची बिनविरोध निवड झाल्याने ठाकरे गटाला मोठा राजकीय धक्का बसला. त्यातच आता किरण सरनाईक यांच्या पाठिंब्यामुळे शिंदे गटाची ताकद आणखी वाढली आहे. काल पार पडलेल्या पत्रकार परिषदेत उपमुख्यमंत्री एकनाथ शिंदे यांनी आमदार किरण सरनाईक यांनी शिवसेनेला पाठींबा जाहीर केला असल्याची घोषणा केली.

हेही वाचा : Kriti Sanon: ब्रेकअपच्या चर्चांना पूर्णविराम! कृती सेननने कबीर बहियासोबतचा खास फोटो शेअर करत चाहत्यांना दिला मोठा संकेत

माध्यमांशी बोलताना एकनाथ शिंदे काय म्हणाले? 

माध्यमांशी बोलताना उपमुख्यमंत्री एकनाथ शिंदे म्हणाले, “मागील आठवड्यात सहा खासदार शिवसेनेत सामील झाले. त्यानंतर विधानपरिषदेचे आमदार सचिन अहिरही आमच्यासोबत आले. आमच्याकडे आधीच प्रताप सरनाईक आहेत आणि आता शिक्षक आमदार किरण सरनाईकही शिवसेनेचे सहयोगी सदस्य म्हणून काम करणार आहेत. त्यांचे मी मनःपूर्वक स्वागत करतो.”

सर्वांचे मनापासून आभार : किरण सरनाईक

तर शिक्षक आमदार किरण सरनाईक यांनीही एकनाथ शिंदे यांच्या नेतृत्वावर विश्वास व्यक्त केला. “राज्याचे तडफदार उपमुख्यमंत्री एकनाथ शिंदे यांनी मला शिवसेनेच्या पदरात घेतले आणि भविष्यात साथ देण्याचे आश्वासन दिले. त्याबद्दल त्यांचे मनःपूर्वक आभार. तसेच या पत्रकार परिषदेला उपस्थित राहिलेल्या सर्व शिक्षकांचेही मी आभार मानतो,” असे सरनाईक यांनी सांगितले.

आगामी काळात अनेकजण शिंदेंच्या शिवसेनेत येणार? 

किरण सरनाईक यांच्या या निर्णयामुळे राज्यातील राजकीय समीकरणांमध्ये आणखी बदल होण्याची शक्यता व्यक्त केली जात असून, दिवसेंदिवस शिंदे गटाची ताकद वाढत चाललेली आहे. त्यामुळे आगामी काळात अनेकजण शिंदेंच्या शिवसेनेत दाखल होण्याची शक्यता वर्तवली जात आहे.

हेही वाचा : Ketan Aggarwal Case : कटात तिसऱ्या व्यक्तीचा सहभाग? केतन अग्रवाल प्रकरणात मोठी अपडेट समोर