पुणेः शहरात जीबीएस आजाराची रुग्णसंख्या वाढत असतानाच आता कोल्हापूर आणि सांगलीमध्ये जीबीएसचा शिरकाव झाला आहे. कोल्हापूरध्ये दोन जीबीएस आजाराचे संशयित रुग्ण आढळून आले असून सांगली शहरात एक आणि ग्रामीण भागात पाच असे सहा संशयित रुग्ण गुइलेन बॅरी सिंड्रोमचे आढळून आले आहेत. यामुळे इथली आरोग्य यंत्रणा सतर्क झाली असून सांगली शहरातील ज्या भागात या आजाराचे रुग्ण आढळले आहेत. त्या भागातील ६०० घरांचे सर्वेक्षण सांगली महापालिकेच्या वतीने करण्यात आले आहे. मात्र, यामुळे इथल्या नागरिकांमध्ये भीतीचे वातावरण तयार झाले आहे.

सांगली जिल्ह्यातील ग्रामीण भागात सहा रुग्ण आढळून आले. तर शहरातील चिंतामणीनगरमध्ये एक रुग्ण आढळून आल्याने सांगलीकरांची चिंता या आजाराने वाढविली आहे. मात्र, हा आजार संसर्गजन्य नसल्याने घाबरून न जाण्याचे आवाहन पालिका प्रशासनाच्या वतीने नागरिकांना करण्यात आले आहे. सांगली शहरात आढळलेला रुग्ण अजमेर, आग्रा आदी ठिकाणी जाऊन आल्याची माहिती मिळत आहे. त्या ठिकाणी या आजाराची लागण झाली असल्याची शक्यता आरोग्य विभागाकडून व्यक्त करण्यात आली आहे.

नागरिकांना आवाहन

पिण्याचे पाणी उकळून प्यावे. स्वच्छताबाबत दक्षता बाळगावी. हातापायामध्ये गोळे, मुंग्या येणे, शरीरात अशक्तपणा जाणवणे, अन्न गिळताना त्रास होणे अशा काही समस्या जाणवत असल्यास तात्काळ वैद्यकीय उपाचार घ्यावेत असे आवाहन पालिका प्रशासनाकडून नागरिकांना करण्यात आले आहे.

पुण्यात एका महिलेचा मृत्यू 

जीबीएस आजाराची लागण झालेल्या एका ५४ वर्षीय महिलेचा मृत्यू झाला आहे. आतापर्यंत या आजाराच्या दोन संशयित रुग्णांचा मृत्यू झाला आहे. आतापर्यंत जीबीएस रुग्णांची संख्या १२७ वरू जाऊन पोहचली आहे. काल बुधवारी तब्बल १७ रुग्णांची वाढ झाल्याने या आजाराने पुणेकरांचे चांगलेच टेन्शन वाढवले आहे.