Sanjay Raut : राष्ट्रवादी काँग्रेसमधील अंतर्गत मतभेद आता चव्हाट्यावर येऊ लागले आहेत. पक्षातील काही बड्या नेत्यांनी दिल्लीत जाऊन केंद्रीय गृहमंत्री अमित शाह यांची भेट घेतल्याने राजकीय वर्तुळात चर्चांना उधाण आले आहे. या भेटीदरम्यान अर्थखाते आणि पार्थ पवार यांच्याकडून पक्षातील ज्येष्ठ नेत्यांना डावलले जात असल्याच्या मुद्द्यांवर चर्चा झाल्याची माहिती समोर आली आहे. दरम्यान, या संपूर्ण घडामोडींवर शिवसेना ठाकरे गटाचे खासदार संजय राऊत यांनी जोरदार टीका केली आहे.

‘अजित पवारांनंतर राष्ट्रवादी काँग्रेस अनाथ’

राष्ट्रवादी काँग्रेसमधील अंतर्गत वादावर भाष्य करताना संजय राऊत यांनी पक्षाच्या नेतृत्वावरच प्रश्नचिन्ह उपस्थित केले. अजित पवार यांच्या निधनानंतर राष्ट्रवादी काँग्रेस अनाथ झाल्याचे ते म्हणाले. तसेच राष्ट्रवादी काँग्रेस हा मूळचा शरद पवार यांनी स्थापन केलेला पक्ष असल्याचेही त्यांनी स्पष्ट केले.

राष्ट्रवादी काँग्रेसच्या नेत्यांनी दिल्लीत जाऊन अमित शाह यांची भेट घेतल्याच्या मुद्द्यावर बोलताना राऊत म्हणाले की, महाराष्ट्राच्या स्वाभिमानाचे थडगे अमित शाह यांनी बांधले आहे. अशा नेत्यांना लाज वाटली पाहिजे. शरद पवार यांनी स्थापन केलेल्या पक्षाचे नाव तुम्हाला जबरदस्तीने देण्यात आले आहे. मात्र, तुम्हाला पक्ष चालवण्याची क्षमता नाही. तुमचा खांदा मजबूत नाही, कणा ताठ नाही, अशा शब्दांत त्यांनी राष्ट्रवादीच्या नेत्यांवर निशाणा साधला.

‘प्रत्येक समस्येसाठी अमित शाहांकडे धाव का?’

पक्षात काही अडचण निर्माण झाली की राष्ट्रवादीचे नेते थेट अमित शाह यांच्याकडे जातात, अशी टीकाही संजय राऊत यांनी केली. शरद पवार यांनी मराठी माणसांसाठी पक्षाची स्थापना केली आणि आता त्याच पक्षातील नेते दिल्लीतील नेत्यांकडे जाऊन बसत आहेत, असा सवाल त्यांनी उपस्थित केला. अमित शाह यांनी महाराष्ट्राला दुबळे करण्यासाठी शिवसेना आणि राष्ट्रवादी काँग्रेसमध्ये फूट पाडून वेगवेगळे गट निर्माण केल्याचा गंभीर आरोपही राऊत यांनी केला.

राष्ट्रवादीच्या भवितव्यावरही भाष्य

यावेळी संजय राऊत यांनी राष्ट्रवादी काँग्रेसच्या भवितव्याबाबतही मोठे विधान केले. सध्याच्या राजकीय घडामोडी पाहता हे पक्ष लवकरच आपले अस्तित्व गमावून बसतील, असा मोठा दावा त्यांनी केला.

Nepal Helicopter Crash: नेपाळमध्ये लँडिंगदरम्यान दोन हेलिकॉप्टरची भीषण टक्कर ; भारतीय पर्यटकाचा मृत्यू, दोघे जखमी