Afghanistan ODI Rankings : क्रिकेट जगतात सर्वात मोठा उलटफेर! इंग्लंड-श्रीलंकेला मागे टाकत अफगाणिस्तानने ICC वन-डे क्रमवारीत रचला नवा इतिहास
Afghanistan ODI Rankings : अफगाणिस्तानने ताज्या आयसीसी क्रमवारीत उत्कृष्ट कामगिरी करत सहावे स्थान पटकावले आहे. या संघाने कोणत्या संघांना मागे टाकले आहे, ते जाणून घ्या.
Afghanistan Script History Enter Top 6 In ICC Men ODI Team Rankings : आंतरराष्ट्रीय क्रिकेटच्या पटलावर अफगाणिस्तान क्रिकेट संघाने एक नवा ऐतिहासिक टप्पा गाठला आहे. आंतरराष्ट्रीय क्रिकेट परिषदेच्या (ICC) ताज्या पुरुष एकदिवसीय (ODI) सांघिक क्रमवारीत अफगाणिस्तानने पहिल्यांदाच थेट सहाव्या स्थानी झेप घेतली आहे. ५० षटकांच्या क्रिकेटमधील ही अफगाणिस्तानची आजवरची सर्वोत्तम क्रमवारी ठरली आहे. माजी विश्वविजेत्या श्रीलंका संघाला मागे सारत अफगाणिस्तानने हे मानाचे स्थान पटकावले असून, २००९ मध्ये आंतरराष्ट्रीय पदार्पण करणाऱ्या या संघाने क्रिकेट जगतात आपली स्वतंत्र ओळख निर्माण केली आहे.
इंग्लंड, वेस्ट इंडिज आणि श्रीलंकेला टाकले मागे; १९१ सामन्यांत ९६ विजय
अफगाणिस्तानचे हे यश अत्यंत उल्लेखनीय मानले जात आहे, कारण त्यांनी बांगलादेश, इंग्लंड आणि दोन वेळच्या विश्वविजेत्या वेस्ट इंडिजपाठोपाठ आता श्रीलंकेलाही मागे सोडले आहे. २००९ मध्ये पदार्पण केल्यापासून संघाने सातत्यपूर्ण कामगिरीच्या जोरावर ही प्रगती केली आहे. अफगाणिस्तानने आतापर्यंत खेळलेल्या १९१ एकदिवसीय आंतरराष्ट्रीय सामन्यांपैकी ९६ सामन्यांत विजय नोंदवला असून, त्यांचा विजय-पराभव गुणोत्तर (Win-Loss Ratio) १.०९ असा प्रभावी राहिला आहे.
विश्वचषकातील ऐतिहासिक कामगिरीमुळे मिळाला वेग –
A landmark moment for Afghanistan as they reach their highest-ever position in the ICC Men’s ODI Team Rankings 📈
https://t.co/VXziN5TNU9
— ICC (@ICC) November 2, 2026
अफगाणिस्तानच्या या घोडदौडीला २०२३ च्या आयसीसी एकदिवसीय विश्वचषकात मोठी गती मिळाली, जिथे त्यांनी माजी जगज्जेत्या पाकिस्तान आणि श्रीलंकेविरुद्ध संस्मरणीय विजय मिळवले होते. त्यानंतर २०२४ च्या टी-२० विश्वचषकात पहिल्यांदाच उपांत्य फेरी गाठून त्यांनी जगातील आघाडीच्या संघांना कडवी टक्कर देण्याची क्षमता सिद्ध केली. या मोठ्या मंचावरील कामगिरीने अफगाण खेळाडूंचा आत्मविश्वास प्रचंड उंचावला.
सलग मालिका विजयांची मालिका; आता कसोटीकडे लक्ष
अलिकडच्या महिन्यांतील शानदार निकालांच्या जोरावर संघाने ही ऐतिहासिक झेप घेतली आहे. आयर्लंडविरुद्ध परदेशात ४-० असा मालिका विजय, त्यानंतर झिम्बाब्वे आणि बांगलादेशविरुद्धच्या तिरंगी मालिकेत अजेय घोडदौड कायम राखली. टी-२० फॉरमॅटमध्येही झिम्बाब्वेविरुद्ध ३-० ने व्हाईटवॉश दिला. मर्यादित षटकांच्या या यशानंतर अफगाणिस्तान संघ आता झिम्बाब्वेविरुद्धच्या आगामी दोन सामन्यांच्या कसोटी मालिकेवर लक्ष केंद्रित करणार आहे.
