Nvidia ceo jensen huang : जगातील सर्वात शक्तिशाली एआय चिप कंपन्यांपैकी एक असलेल्या ‘एनव्हिडिया’चे सीईओ ‘जेनसन हुआंग’ सध्या एका मोठ्या वादाच्या भोवऱ्यात सापडले आहेत. एका बाजूला पत्नीशी प्रतारणा केल्याची कबुली देत त्यांनी कुटुंबीयांची आणि कर्मचाऱ्यांची माफी मागितली आहे; तर दुसरीकडे त्यांचे एका चिनी व्यावसायिक महिलेशी असलेले कथित संबंध आणि ती महिला चीनसाठी हेरगिरी करत असल्याच्या आरोपांनी अमेरिकेतील राजकीय आणि तंत्रज्ञान क्षेत्रात खळबळ उडवली आहे.

प्रकरणाचे गांभीर्य लक्षात घेऊन एनव्हिडियाच्या संचालक मंडळाने स्वतंत्र चौकशी सुरू केली आहे. विशेष म्हणजे, या प्रकरणात केवळ एका अब्जाधीश उद्योगपतीच्या वैयक्तिक आयुष्याचा प्रश्न नाही, तर अमेरिकेच्या राष्ट्रीय सुरक्षेचा आणि अत्याधुनिक एआय चिप्स चीनपर्यंत पोहोचल्याच्या संशयाचाही मुद्दा उपस्थित झाला आहे. त्यामुळे हुआंग यांची माफी आणि कंपनीची चौकशी याकडे संपूर्ण जगाचे लक्ष लागले आहे.

‘पत्नीशी प्रतारणा केली, माझी चूक मान्य’

६३ वर्षीय जेनसन हुआंग यांनी एनव्हिडियाच्या कर्मचाऱ्यांना संदेश पाठवून आपल्या कृतीबद्दल खेद व्यक्त केला. पत्नी आणि मुलांना आपल्या वागण्यामुळे त्रास झाल्याचे मान्य करत त्यांनी त्यांची माफी मागितली. “मी जे केले त्यासाठी कोणतेही कारण देणार नाही. माझ्या कृतीमुळे पत्नी आणि मुलांना वेदना झाल्या. मला त्याचा मनापासून खेद आहे,” अशा आशयाची कबुली त्यांनी दिली.

केवळ कुटुंबीयच नव्हे, तर कंपनीचे कर्मचारी, संचालक मंडळ आणि भागधारकांप्रती असलेली जबाबदारी पार पाडण्यातही आपण कमी पडलो, असे त्यांनी संदेशात नमूद केले. एनव्हिडियाचे नेतृत्व करणे हा आपल्या आयुष्यातील मोठा सन्मान असल्याचे सांगत, पुन्हा विश्वास संपादन करण्यासाठी पूर्ण प्रयत्न करणार असल्याचेही त्यांनी स्पष्ट केले.

चिनी महिला हेर असल्याचा संशय; नेमकं प्रकरण काय?

या वादाच्या केंद्रस्थानी ‘एलिस हुआंग’ नावाची चिनी व्यावसायिक महिला आहे. द न्यूयॉर्क टाइम्स आणि अन्य माध्यमांच्या वृत्तांनुसार, एलिस हुआंग यांचे एनव्हिडियाचे सीईओ जेनसन हुआंग यांच्याशी जवळचे संबंध होते. अमेरिकन गुप्तचर यंत्रणांशी संबंधित माहितीचा हवाला देत काही वृत्तांमध्ये एलिस हुआंग यांना चीनच्या गुप्तचर यंत्रणेने जेनसन हुआंग यांच्याबाबत माहिती मिळवण्यासाठी लक्ष्य केले होते, असा दावा करण्यात आला आहे.

एलिस हुआंग या सिंगापूरस्थित मेगास्पीड इंटरनॅशनल या डेटा सेंटर कंपनीशी संबंधित होत्या. ही कंपनी एनव्हिडियाची ग्राहक होती. त्यामुळे या संबंधांचा वापर करून कंपनीच्या संवेदनशील माहितीपर्यंत किंवा अत्याधुनिक एआय चिप्सच्या पुरवठ्याशी संबंधित निर्णयांपर्यंत पोहोचण्याचा प्रयत्न झाला का, असा प्रश्न उपस्थित झाला आहे. मात्र, एलिस हुआंग चिनी हेर असल्याचा आरोप स्वतंत्रपणे सिद्ध झालेला नाही. चीनच्या परराष्ट्र मंत्रालयाने हा आरोप निराधार असल्याचे सांगत फेटाळला आहे.

चीनला एआय चिप्स मिळवून देण्यासाठी संबंधांचा वापर झाला का?

अमेरिकेने राष्ट्रीय सुरक्षेच्या कारणास्तव अत्याधुनिक एआय चिप्सच्या चीनमधील निर्यातीवर निर्बंध घातले आहेत. अशा परिस्थितीत एनव्हिडियाच्या चिप्स चीनमधील कंपन्यांपर्यंत पोहोचवण्यासाठी काही व्यावसायिक नेटवर्कचा वापर झाला का, याचीही चौकशी सुरू आहे.

मेगास्पीड कंपनीच्या चिप खरेदी आणि चीनशी संबंधित व्यवहारांवर यापूर्वीही प्रश्न उपस्थित झाले होते. त्यामुळे जेनसन हुआंग आणि एलिस हुआंग यांच्यातील कथित संबंधांचा या व्यवहारांशी काही संबंध होता का, याचा तपास महत्त्वाचा ठरणार आहे.

रॉयटर्सने १० नोव्हेंबर रोजी दिलेल्या वृत्तानुसार, द इन्फॉर्मेशन या माध्यमाने संबंधित व्यावसायिक नेटवर्कमार्फत किमान ७.५ अब्ज डॉलर मूल्याच्या एनव्हिडिया चिप्स चीनमधील कंपन्यांपर्यंत पोहोचल्याचा दावा केला आहे. मात्र, या व्यवहारांतील कथित अनियमितता आणि हुआंग यांच्या वैयक्तिक संबंधांचा थेट संबंध सिद्ध झालेला नाही.

एनव्हिडियाची स्वतंत्र चौकशी; संचालक मंडळाचे काय म्हणणे?

या संपूर्ण प्रकरणाची गंभीर दखल घेत एनव्हिडियाच्या संचालक मंडळाने स्वतंत्र समितीमार्फत चौकशी सुरू केली आहे. या चौकशीसाठी बाहेरील कायदेशीर तज्ज्ञांची मदत घेतली जाणार आहे. जेनसन हुआंग यांनीही चौकशीला पूर्ण सहकार्य करण्याचे आश्वासन दिले आहे.

दरम्यान, कंपनीच्या संचालक मंडळाने राष्ट्रीय सुरक्षा किंवा एनव्हिडियाच्या गोपनीय माहितीशी तडजोड झाल्याचा कोणताही पुरावा सध्या नसल्याचे स्पष्ट केले आहे. चौकशीत उपलब्ध असलेली सर्व माहिती तपासली जाणार असून अमेरिकेची राष्ट्रीय आणि आर्थिक सुरक्षा ही प्राथमिकता असल्याचे कंपनीने म्हटले आहे. हुआंग हे चौकशी सुरू असतानाही सीईओ पदावर कायम राहणार असल्याचे कंपनीने स्पष्ट केले आहे.