नवी दिल्ली  – अदानी समूहातील अदानी ग्रीन एनर्जीने 600 दशलक्ष डॉलरचे कर्जरोखे उभारण्याची योजना सुरू केली होती. मात्र अमेरिकेतील कायदा विभाग व शेअर बाजार नियंत्रकांनी अदानी समूहातील अर्धा डझन अधिकार्‍यांवर भ्रष्टाचाराचे आरोप केले आहेत. त्यानंतर अदानी समूहाने ही रोखे विक्री योजना थांबविली आहे.

अदानी समुहाने 20 वर्षाच्या मुदतीचे ग्रीन बॉण्ड विक्रीसाठी उपलब्ध केले होते. या बॉण्डला अपेक्षेपेक्षा तीन पट जास्त प्रतिसाद मिळाला. मात्र तरीही अमेरिकेत आरोप होण्याअगोदर काही तास अदानी समूहाने या बॉण्ड विक्री संदर्भातील पुढील प्रक्रिया स्थगित केली असल्याची घोषणा केली.

न्यूयॉर्कमधील एका न्यायालयात अदान ग्रीन एनर्जीच्या संचालक मंडळाविरुद्ध कायदेशीर कारवाई सुरू झाली आहे. यामध्ये विनीत जैन यांचाही समावेश आहे. अशा परिस्थितीत या बॉण्डच्या विक्री संदर्भातील पुढील प्रक्रिया करणे योग्य ठरणार नाही असे अदानी ग्रीन एनर्जीने शेअर बाजाराला कळविलेल्या माहितीत म्हटले आहे.

या बॉण्डची विक्री गेल्या महिन्यातही करण्याचा प्रयत्न करण्यात आला होता. मात्र काही खरेदी करणार्‍या लोकांनी बॉण्डची किंमत अपेक्षा पेक्षा जास्त असल्याचे सांगितल्यानंतर ही विक्री पुढे ढकलणत आली होती.

सुधारित किमतीनुसार आता बॉण्ड उपलब्ध करण्यात आला होता. त्याला प्रतिसादही मिळाला होता. आता नव्या परिस्थितीमुळे पुन्हा ही प्रक्रिया स्थगित करण्यात आली आहे. सर्व बॉण्डसाठी मागणी आली होती. मात्र आता ते सर्व पैसे गुंतवणूकदारांना परत करण्यात येत आहेत.

गेल्या वर्षीही या कंपनीने 20,000 कोटी रुपयांची फॉलो ऑन ऑफर जारी केली होती. मात्र नंतर हिंडेनबर्ग समूहाने आरोप केल्यानंतर ही भांडवल उभारणी स्थगित करण्यात आली होती. त्यानंतर या समूहातील कंपन्यांचे बाजार मूल्य 150 अब्ज डॉलरने कमी झाले होते. आता ही तूट भरून निघत असतानाच पुन्हा नवे आरोप समोर आले आहेत.

मुडीज् करणार फेरमुल्यांकन
मुडीज् या पतमानांकन संस्थेने अदानी समूहावर आरोप झाल्यानंतर या समूहाच्या व्यवस्थापनाचे फेर मूल्यांकन करण्याची गरज असल्याचे म्हटले आहे. सध्या होत असलेल्या घडामोडी अदानी समूहाचे पतमुल्यांकन कमी करणार्‍या आहेत. आता या समूहाचे फेर मूल्यांकन करण्याची गरज आहे. त्या आधारावर गुंतवणूकदार या समूहात गुंतवणूक करण्यासंदर्भात निर्णय घेऊ शकती.