मंचर : विनापरवाना शेतमाल खरेदी-विक्री करणाऱ्या व्यापाऱ्यांवर आता कडक कायदेशीर कारवाई करण्यात येणार आहे. महाराष्ट्र कृषी उत्पन्न पणन अधिनियमातील सुधारित तरतुदींची प्रभावी अंमलबजावणी करण्यासाठी पणन संचालक कार्यालयाने ३० सप्टेंबर २०२६ रोजी महत्त्वाचे परिपत्रक जारी केले आहे. शेतकऱ्यांची आर्थिक फसवणूक रोखणे आणि शेतीमालाच्या व्यापारात पारदर्शकता आणणे हा या निर्णयामागील उद्देश आहे.अशी माहिती मंचर येथील कृषी बाजार समितीचे सभापती निलेश थोरात यांनी दिली.

नवीन तरतुदींनुसार अधिसूचित शेतमालाची खरेदी-विक्री करण्यासाठी खासगी बाजार, थेट पणन,एकल बाजार किंवा संबंधित बाजार समितीचा व्यापारी परवाना असणे बंधनकारक आहे. अडत दुकाने, गोदामे आणि प्रक्रिया उद्योगांनाही परवान्याची अट लागू राहणार आहे.बाजार आवाराबाहेर फळे, भाजीपाला तसेच आले,लसूण,धने आणि मिरची यांसारख्या नियमनमुक्त शेतमालाची खरेदी करतानाही परवानाधारक व्यापारी असणे आवश्यक आहे.मात्र, नियमनमुक्त शेतमालाच्या व्यवहारांवर बाजार समित्यांना बाजार शुल्क आकारता येणार नाही.

विनापरवाना व्यापार करणाऱ्यांविरोधात बाजार समित्यांनी अधिनियमातील कलम ४६ आणि ५२ नुसार कारवाई करावी,असे निर्देश देण्यात आले आहेत. व्यापाऱ्यांनी शेतकऱ्यांना शेतमाल विक्रीची पावती देणेही बंधनकारक आहे.या नियमांचे पालन करण्याचे आवाहन बाजार समितीचे सभापती निलेश थोरात यांनी केले असून, विनापरवाना खरेदी करणाऱ्या व्यापाऱ्यांची माहिती बाजार समितीला द्यावी,असे उपसभापती सचिन पानसरे यांनी सांगितले.