पुणे : शहरातील वाहतूक कोंडी कमी करण्यासाठी महापालिकेकडून रस्ता रूंदीकरण करण्यात आले आहे. मात्र, या रस्त्यांवर आता मोठ्या प्रमाणात अनधिकृत व्यावसायिक आणि अनधिकृत जाहीरात फलक उभारण्यात आले आहेत. त्यावर तातडीनं कारवाई न झाल्यास संबधित अधिकाऱ्यांवर कारवाई करण्यात येणार असल्याचे आदेश महापालिका प्रशासनास दिले असल्याची माहिती नगरविकास विभागाच्या राज्यमंत्री माधुरी मिसाळ यांनी विधानसभेत दिली.

कॅन्टोन्मेट विधानसभा मतदारसंघाचे आमदार सुनिल कांबळे यांनी शहरातील दिवसें दिवस गंभीर होणारी वाहतूक कोंडीमुळे नागरिकांना होणारा मनस्ताप तसेच, शहरात वाहनांची भरमसाठ संख्या वाढलेली असताना पोलीस, महापालिका आणि आरटीओ कडून दूर्लक्ष होत असल्याची लक्षवेधी उपस्थित केली होती.

तसेच, शहरात महापालिका रस्त्यांचे रूंदीकरण करत असली तरी त्यावर वारंवार अनधिकृत पार्किंग, अतिक्रमणे होतात. त्यामुळे, वाहतूक कोंडी होत असून अपघातांची संख्या वाढल्याने घरातून बाहेर पडलेली व्यक्ती परत येइल का नाही अशी भिती नागरिकांमध्ये असते. या बाबत शासन काय करणार असा प्रश्न उपस्थित केला होता.

राज्यमंत्री मिसाळ म्हणाल्या की, शहरातील वाहतूक कोंडी फोडण्य़ासाठी एकात्मिक वाहतूक विकास आराखडा तयार करण्यात आलेला आहे. त्याद्वारे, मेट्रो, उड्डाणपूल, रस्ता रूंदीकरण, भुयारी मार्ग प्रस्तावित आहेत. मात्र, शहरातील रस्त्यावर झालेली अतिक्रमणे ही वस्तुस्थिती असून ती तातडीनं काढण्याचे आदेश महापालिकेस दिले आहेत. तसेच, जर या अतिक्रमणांवर कारवाईस दिरंगाई झाली अथवा कारवाई केली जात नसल्यास संबधित अधिकाऱ्यास जबाबदार धरून त्यांच्यावर कारवाई करण्याच्या सूचना राज्यशासनाकडून महापालिकेस देण्यात आल्या आहेत