Maharashtra Politics : भिवंडी निजामपूर महानगरपालिकेतील स्वीकृत नगरसेवकांच्या निवडीवरून समाजवादी पक्षात मोठा वाद निर्माण झाला आहे. पक्षाचा आदेश डावलून भाजप आमदार महेश चौघुले यांचे समर्थक मानले जाणारे भरत जंगलानी यांच्या नावाला पाठिंबा दिल्याचा आरोप करत पक्षाने सहा नगरसेवकांची हकालपट्टी केली आहे. या कारवाईमुळे भिवंडीतील राजकीय वातावरण चांगलेच तापले आहे.

समाजवादी पक्षाचे प्रदेशाध्यक्ष अबू आसिम आजमी यांच्या आदेशानुसार शहराध्यक्ष रियाज आजमी यांनी ही कारवाई जाहीर केली. हकालपट्टी करण्यात आलेल्या नगरसेवकांमध्ये गटनेते आरिब याकूब शेख, काशफी शाफ मोमिन, आजीब जमाल मोमिन, अन्सारी शबाना शमीम, शेख सलमाबानो मोहम्मद अक्रम आणि खान अमल उबैद यांचा समावेश आहे.

स्वीकृत नगरसेवकांच्या निवडीवरून वाद

भिवंडी महानगरपालिकेच्या विशेष महासभेत महापौर नारायण चौधरी यांनी नऊ स्वीकृत नगरसेवकांच्या नियुक्त्यांची घोषणा केली. निवड झालेल्या उमेदवारांच्या समर्थकांनी जल्लोष करत आनंद व्यक्त केला. काही ठिकाणी मिरवणुका काढून निवडीचा उत्सवही साजरा करण्यात आला.

मात्र, समाजवादी पक्षाच्या गोटात या निवडीवरून नाराजी निर्माण झाली. पक्षाने दिलेल्या आदेशानुसार उमेदवाराची शिफारस न करता भरत जंगलानी यांच्या नावाला पाठिंबा दिल्याचा आरोप संबंधित नगरसेवकांवर करण्यात आला. जंगलानी हे भाजप आमदार महेश चौघुले यांचे समर्थक मानले जात असल्याने पक्षनेतृत्वाने या प्रकरणाची गंभीर दखल घेतल्याचे सांगितले जात आहे.

पक्षाच्या कारवाईमुळे राजकीय चर्चांना उधाण

पक्षाच्या भूमिकेविरोधात गेल्याचा ठपका ठेवत सहा नगरसेवकांवर कारवाई करण्यात आल्याने भिवंडीतील राजकीय वर्तुळात चर्चांना उधाण आले आहे. या निर्णयामुळे संबंधित ६ नगरसेवकांची पुढील राजकीय भूमिका काय असेल, याबाबत उत्सुकता निर्माण झाली आहे.

दरम्यान, समाजवादी पक्षाचे नेतृत्व हकालपट्टीचा निर्णय मागे घेणार का, की कारवाई कायम ठेवणार, हे आगामी काळात स्पष्ट होईल. या घडामोडींचा भिवंडी महानगरपालिकेतील राजकीय समीकरणांवर काय परिणाम होतो, याकडे सर्वांचे लक्ष लागले आहे.

PMRDA News: उद्योजकांसाठी मोठी बातमी! पीएमआरडीए सुरू करणार विशेष ‘फॅसिलिटेशन सेंटर’; परवानग्यांना मिळणार गती