बांदीपोरा  – जम्मू-काश्‍मीरच्या बांदीपोरा जिल्ह्यात, लष्कराच्या एका जवानाच्या सर्व्हिस रायफलमधून चुकून गोळीबार झाला. यामुळे एक जवान शहीद झाला, तर दुसरा जखमी झाला. या प्रकरणाची माहिती बांदीपोरा जिल्हा पोलिसांनी दिली.

अधिक माहितीनुसार, हे प्रकरण 14 राष्ट्रीय रायफल्सच्या कॅम्पशी संबंधित आहे. रविवारी कॅम्पमध्ये एका सैनिकाची रायफल चुकून जमिनीवर पडली. त्यामुळे रायफलमधून गोळीबार झाला.

यात दोन जवानांना गोळ्या लागल्या. दोघांनाही तातडीने रुग्णालयात नेण्यात आले, तेथे डॉक्‍टरांनी एकाला मृत घोषित केले. तर अन्य एकावर उपचार सुरू आहेत.

घटनेनंतर आरोपी शिपायाला ताब्यात घेण्यात आले आहे. प्रोटोकॉलनुसार कायदेशीर कारवाई सुरू करण्यात आली आहे. त्याचबरोबर छावणीत उपस्थित असलेल्या इतर जवानांचीही चौकशी केली जात आहे, जेणेकरून घटना कशी घडली हे समजू शकेल.