Abhijeet Dipke : दिल्लीतील जंतर-मंतर येथे निदर्शनांवर बंदी घातल्यास देशभर आंदोलने सुरू होतील, असा इशारा कॉकरोच जनता पार्टीचे संस्थापक अभिजीत दिपके (Abhijeet Dipke) यांनी मंगळवारी दिला. दिपके म्हणाले, दिल्लीला जात असताना पोलिसांनी त्यांना अडवले, तर ज्या ठिकाणी त्यांना ताब्यात घेतले जाईल, तिथूनच ते आंदोलन सुरू करतील.

मुख्य निवडणूक आयुक्त ज्ञानेश कुमार यांच्या राजीनाम्याची मागणी करणाऱ्या सीजेपीच्या आंदोलनात सहभागी होण्यासाठी आपण बुधवारी राष्ट्रीय राजधानीत पोहोचू, असेही त्यांनी सांगितले. हिंगोली जिल्ह्यात आपल्या मूळ गावी, संतुक पिंपरी येथे ते प्रसारमाध्यमांशी बोलत होते.

११ ऑक्टोबर रोजी जारी केलेल्या एका आदेशात, दिल्लीचे पोलीस आयुक्त अनुराग कुमार यांनी जंतर-मंतरचा अधिकृत आंदोलन स्थळ म्हणून असलेला दर्जा रद्द केला. त्याऐवजी रामलीला मैदान, बुराडी मैदान आणि सीबीडी मैदान ही तीन ठिकाणे मोठ्या निदर्शनांसाठी निश्चित केली.

सीजेपीने सांगितले की, त्यांचे नेते सौरव दास आणि आशुतोष रंका यांना पोलिसांनी ताब्यात घेतले. कडक सुरक्षा व्यवस्था आणि बॅरिकेड्स असूनही ते जंतर-मंतरवर पोहोचले होते. मुख्य निवडणूक आयुक्त ज्ञानेश कुमार राजीनामा देत नाहीत तोपर्यंत त्यांचे आंदोलन सुरूच राहील, असे दिपके (Abhijeet Dipke) यांनी सांगितले.

जंतर-मंतर हा आंदोलनांचा आत्मा असल्याचे सांगत त्यांनी पंतप्रधान नरेंद्र मोदी आणि केंद्रीय गृहमंत्री अमित शहा यांच्यावर लोकशाही मार्गाने व्यक्त होणारा विरोध दडपल्याचा आरोप केला. ते कुठे आंदोलन करतील असे विचारले असता, संपूर्ण राष्ट्र जंतर-मंतर बनेल आणि दिल्लीही जंतर-मंतर बनेल, असे दिपके (Abhijeet Dipke) म्हणाले.

पंतप्रधान नरेंद्र मोदींना आंदोलनाशी अडचण आहे, आंदोलनाच्या ठिकाणाशी नाही. त्यांना लोकांच्या निषेध करण्याच्या कल्पनेशीच अडचण आहे आणि ही हुकूमशहाची लक्षणे आहेत. जर त्यांना वाटत असेल की जंतर-मंतर हे आंदोलनाचे अधिकृत ठिकाण म्हणून रद्द केल्याने आंदोलन थांबेल, तर संपूर्ण देशच जंतर-मंतर बनेल. जंतर-मंतर हा प्रत्येक आंदोलकाचा आत्मा आहे
– अभिजीत दिपके, संस्थापक, सीजेपी