Aaditya Thackeray : भाजप-नेतृत्वाखालील सरकार मुंबईतील छत्रपती शिवाजी महाराज आंतरराष्ट्रीय विमानतळ संपवण्याचा आणि शहराची जगाशी जोडले जाण्याची क्षमता नष्ट करण्याचा प्रयत्न करत असल्याचा आरोप ठाकरेसेना नेते आदित्य ठाकरे (Aaditya Thackeray) यांनी केला आहे.

मुंबई इंटरनॅशनल एअरपोर्ट लिमिटेडने टर्मिनल- २ वरील आंतरराष्ट्रीय उड्डाणांच्या स्लॉट्समध्ये प्रस्तावित केलेली ३३ टक्क्यांची कपात, तसेच हिवाळी वेळापत्रकातील विद्यमान वचनबद्धता आणि अर्थपूर्ण चर्चेचा अभाव, या कारणांमुळे विमान कंपन्यांनी या प्रस्तावाला विरोध दर्शवला आहे, अशा एका वृतावर ते प्रतिक्रिया देत होते.

एक्सवरील एका पोस्टमध्ये ठाकरे म्हणाले, ज्या भाजप सरकारच्या काळात भारताचे हरवलेले दशक अनुभवले गेले, त्या काळात अनेक कंपन्या, उत्पादक आणि अगदी आंतरराष्ट्रीय वित्तीय सेवा केंद्रांना मुंबईतून बाहेर जाण्यास भाग पाडले गेले.

याचा भारताच्या एकूण अर्थव्यवस्थेवरही विपरीत परिणाम झाला. आता आमचे विमानतळ संपवून, भाजप जाणीवपूर्वक मुंबईची जगाशी जोडले जाण्याची क्षमता नष्ट करण्याचा प्रयत्न करत आहे, असेही ते (Aaditya Thackeray) म्हणाले.

नवी मुंबईतील डी.बी. पाटील आंतरराष्ट्रीय विमानतळ हे एक अतिरिक्त (प्लस-वन) विमानतळ म्हणून विकसित होणे अपेक्षित आहे; केवळ प्रवाशांची गैरसोय करणारे आणि त्यांची लूट करणारे विमानतळ म्हणून नव्हे. ही लूट नक्की कोणाच्या फायद्यासाठी केली जात आहे? असा सवाल ठाकरे (Aaditya Thackeray) यांनी केला.