प्रभात वृत्तसेवा पुणे – खडकवासला-पानशेत रस्त्यावर असलेल्या खानापूर येथील एका सराफी पेढीवर सशस्त्र दरोडा टाकून चोरट्यांनी १४४ तोळे सोन्याचे दागिने, २० हजारांची रोकड असा एक कोटी ४३ लाख ५७ हजार रुपयांचा ऐवज लुटून नेल्याची घटना घडली. याप्रकरणी पाच ते सहा दरोडेखोरांविरुद्ध हवेली पोलीस ठाण्यात गुन्हा दाखल करण्यात आला आहे. याबाबत एका महिलेने हवेली पोलीस ठाण्यात फिर्याद दिली आहे. याप्रकरणी पाच ते सहा दरोडेखोरांविरुद्ध गुन्हा दाखल करण्यात आला असून, पसार झालेल्या दरोडेखोरांना पकडण्यासाठी पोलिसांची पथके रवाना झाली आहेत.पानशेत रस्त्यावर खानापूर येथे सराफी पेढी आहे. शुक्रवारी (२६ डिसेंबर) दुपारी साडेबाराच्या सुमारास पाच ते सहा दरोडेखोर सराफी पेढीत शिरले. दरोडेखोरांनी त्यांचे चेहरे रुमालाने झाकले होते. दरोडेखोरांकडे कोयते, तलवारी होत्या. सराफी पेढीतील कर्मचाऱ्यांना शस्त्राचा धाक दाखवून दरोडेखोरांनी ११४ तोळे सोन्याचे दागिने, गल्ल्यातील २० हजारांची रोकड असा एक कोटी ४३ लाख ५७ हजार रुपयांचा ऐवज लुटून नेला.या घटनेची माहिती मिळताच अतिरिक्त पोलीस अधीक्षक रमेश चाेपडे, उपविभागीय अधिकारी सुनीलकुमार पुजारी, पोलीस निरीक्षक वैशाली पाटील, स्थानिक गुन्हे अन्वेषण शाखेचे पोलीस निरीक्षक अविनाश शिळीमकर यांनी घटनास्थळी भेट दिली. पोलिसांनी सराफी पेढीतील चित्रीकरण तपासले असून, पसार झालेल्या चोरट्यांचा माग काढण्यात येत आहे. पोलिसांनी खानापूर परिसरातील ग्रामस्थांची चौकशी केली. दरोडा टाकल्यानंतर चोरटे दाट झाडीतून पसार झाल्याची माहिती ग्रामस्थांनी पोलिसांना दिली.
