Preity Zinta : प्रकरण गंभीर; बॅालिवूड अभिनेत्री प्रीती झिंटाने घेतली न्यायालयात धाव, नेमकं काय घडलं?
Preity Zinta : या प्रकरणी तिने न्यायालयाकडे तातडीने हस्तक्षेप करण्याची मागणी केली आहे.
Preity Zinta : कृत्रिम बुद्धिमत्ता (AI) तंत्रज्ञानाच्या वाढत्या गैरवापरामुळे कलाविश्वातील कलाकारांच्या प्रतिमेला मोठा धक्का बसत आहे. यासंदर्भात अनेक तक्रारी समोर आल्या आहेत. अनेक प्रकरणे अत्यंत गंभीर असून, एआय तंत्रज्ञानाचा गैरवापर करण्याचा प्रकार सुरू आहे.
याचसंदर्भात बॉलिवूडमधील प्रसिद्ध अभिनेत्री प्रीती झिंटाने थेट मुंबई उच्च न्यायालयाचे दार ठोठावले आहे. सोशल मीडिया आणि विविध ऑनलाइन प्लॅटफॉर्मवर तिचे AIच्या मदतीने तयार केलेले डीपफेक फोटो, मॉर्फ केलेले व्हिडिओ आणि बनावट संदेश प्रसारित होत असल्याचा आरोप तिने याचिकेत केला आहे. या प्रकरणी तिने न्यायालयाकडे तातडीने हस्तक्षेप करण्याची मागणी केली आहे.
या याचिकेची गंभीर दखल मुंबई उच्च न्यायालयाने घेतली असून संबंधित ऑनलाइन प्लॅटफॉर्मना आक्षेपार्ह मजकूर त्वरित हटवण्याचे आदेश दिले आहेत. डिजिटल युगात AIच्या सहाय्याने तयार होणारे डीपफेक फोटो आणि व्हिडिओ ही गंभीर समस्या बनत आहे. दिवसेंदिवस या घटनांमध्ये वाढ होत चाललेली आहे. त्यामुळे या संदर्भातील कायदा कडक करून त्याची अंमलबजावणी करण्याची मागणी देखील जोर धरू लागली आहे.
अनेक सेलिब्रिटींच्या प्रतिमेचा गैरवापर करून बनावट दृश्ये आणि संदेश सोशल मीडियावर व्हायरल केले जात असून, त्यामुळे त्यांच्या प्रतिष्ठेला आणि वैयक्तिक प्रतिमेला मोठा धक्का बसत आहे.
प्रीती झिंटाने दाखल केलेल्या याचिकेत भविष्यात तिच्या परवानगीशिवाय अशा प्रकारचा कोणताही AI-आधारित मजकूर प्रसारित किंवा प्रकाशित करू नये, असे निर्देश संबंधितांना देण्याची विनंतीही न्यायालयाकडे करण्यात आली आहे. या प्रकरणाची प्राथमिक सुनावणी न्यायमूर्ती माधव जामदार यांच्या खंडपीठासमोर झाली. या प्रकरणाची पुढील सुनावणी ६ जुलै रोजी होणार आहे.
पुन्हा रुपेरी पडद्यावर पुनरागमन
याआधीही ऐश्वर्या राय, जॅकी श्रॉफ आणि सलमान खान यांसारख्या अनेक नामांकित कलाकारांनी त्यांच्या ‘पर्सनॅलिटी राइट्स’च्या संरक्षणासाठी न्यायालयात धाव घेतली होती. अशा प्रकरणांमध्ये न्यायालयाने सोशल मीडिया प्लॅटफॉर्मना अधिक जबाबदारीने वागण्याचे निर्देश दिले आहेत. दरम्यान, प्रीती झिंटा अनेक वर्षांनंतर पुन्हा रुपेरी पडद्यावर पुनरागमन करत आहे. ती अभिनेता सनी देओलसोबत ‘बंटवारा’ या चित्रपटात प्रमुख भूमिकेत दिसणार असून, हा चित्रपट ऑगस्ट महिन्यात प्रेक्षकांच्या भेटीला येणार आहे.
