न्यूयॉर्क : सध्या लोक एकमेकांना संदेश देण्यासाठी स्मार्टफोनचा वापर करतात. मात्र काही वर्षांपूर्वीपर्यंत लोक एकमेकांना संदेश देण्यासाठी पत्रांचा वापर करत होते. पत्रावर अनेक गाणी आणि कविताही लिहिल्या गेल्या आहेत. पूर्वी लोक त्यांच्या पत्रांची आतुरतेने वाट पाहत असत. कधी कधी पत्रे पोहोचायला वेळ लागत असे, त्यामुळे लोक आतुरतेने पोस्टमनची वाट पाहत बसायचे.

सध्या एक असे प्रकरण समोर आले आहे ज्याने लोकांना जुन्या काळातील पत्राची आठवण करून दिली आहे. खरंतर लंडनमध्ये एका व्यक्तीच्या घरी पत्र पोहोचलं, पण हे पत्र पाहून त्याला आनंद झाला नाही, उलट आश्चर्यच वाटलं. सर्वात आश्चर्याची गोष्ट म्हणजे हे पत्र 100 वर्षे जुने आहे आणि शतकानंतर योग्य पत्त्यावर पोहोचले आहे.

आता कल्पना करा की व्हॉट्सअॅप आणि एसएमएसच्या जमान्यात 100 वर्ष जुने पत्र तुमच्या घरी पोहोचेल, तर तुम्हाला काय वाटेल? लंडनमध्ये राहणाऱ्या एका व्यक्तीच्या घरी 100 वर्षे जुने पत्र पोहोचले तेव्हा त्यालाही आश्चर्याचा धक्का बसला. हे पत्र 1916 मध्ये लिहिले गेले होते, जे आता योग्य पत्त्यापर्यंत पोहोचले आहे. हे पत्र इंग्लंडमधील बाथ शहरातून लिहिण्यात आले आणि त्या पत्त्यावर राहणाऱ्या लोकांना धक्काच बसला.

या पत्रावर पेनी जॉर्ज पंचमचा शिक्का आहे, ज्यावरून हे पत्र पहिल्या महायुद्धात लिहिले गेले असावे असा अंदाज वर्तवला जात आहे. थिएटर डायरेक्टर फिनले ग्लेन यांनी माध्यमांशी संवाद साधताना सांगितले की, त्यांना वाटले की हे पत्र 2016 मध्ये लिहिले गेले असावे कारण त्यावर फक्त 16 वर्ष लिहिलेले आहे, परंतु नीट पाहिल्यावर राणीच्या ऐवजी राजाचा शिक्का असल्याचे दिसून आले. त्यावरून ते 1916 सालचे पत्र असल्याचे समजले.

पत्र काही वर्षांपूर्वी त्याच्या पत्त्यावर पोहोचले होते, परंतु त्याचा इतिहास जाणून घेण्यासाठी फिनले ग्लेनला वेळ लागला. यानंतर आता त्यांनी हे पत्र स्थानिक इतिहास संस्थेकडे सुपूर्द केले आहे जेणेकरून अधिक माहिती मिळू शकेल.

* काय आहे या पत्राचा इतिहास ?
ग्लेनने ते पत्र द नॉरवुड रिव्ह्यू या स्थानिक इतिहास मासिकाचे संपादक स्टीफन ऑक्सफर्ड यांना दाखवले. त्यांनी सांगितले की, हे पत्र केटी मार्श नावाच्या महिलेसाठी लिहिले होते. या महिलेचा विवाह त्या काळातील प्रसिद्ध मुद्रांक विक्रेता ओसवाल्ड मार्शशी झाला होता. मार्शची मैत्रीण ख्रिस्ताबेल मेनेलने तिला हे पत्र लिहिले आहे. या पत्रात त्यांनी लाज वाटल्याचे बोलले आहे. यासोबतच तिने ती जिथे राहत होती त्या भयानक थंडीबद्दलही सांगितले आहे. मेनल ही एका श्रीमंत चहा व्यापाऱ्याची मुलगी होती.

ऑक्सफर्डच्या म्हणण्यानुसार, पत्र त्या वेळी पोस्ट ऑफिसमध्ये हरवले असावे आणि आता ते नूतनीकरणादरम्यान सापडले आहे आणि त्यांनी ते योग्य पत्त्यावर पाठवले आहे.