नाशिक : राज्यातील महानगरपालिका निवडणुकीच्या तयारीत प्रशासनाकडून होणाऱ्या नियुक्त्यांमध्ये मोठी चूक समोर आली आहे. मालेगाव महानगरपालिका निवडणुकीसाठी नांदगाव तालुक्यातील साकोरा येथील एका मयत शिक्षकाची मतदान अधिकारी म्हणून नियुक्ती करण्यात आली आहे. हे शिक्षक संतोष शिवाजी बोरसे (साकोरा) यांचे नाव आहे, ज्यांचे चार महिन्यांपूर्वी निधन झाले होते. मालेगाव मनपाच्या केंद्र क्रमांक ४८ वरील मतदान पथकात चार शिक्षकांची नियुक्ती करण्यात आली असून, त्यात मयत संतोष बोरसे यांचाही समावेश आहे. हे नियुक्ती पत्रक मालेगाव मनपाचे प्रशासक तथा आयुक्त रविंद्र जाधव यांनी जारी केले आहे. या चुकामुळे नांदगाव तालुका पंचायत समितीच्या शिक्षण विभागासमोर मोठा प्रश्न निर्माण झाला आहे. “हा आदेश नेमका कुणाला आणि कसा बजावायचा?” असा प्रश्न उपस्थित झाला आहे. मालेगाव महापालिका प्रशासनाने या चुकीची जबाबदारी नांदगाव पंचायत समितीच्या शिक्षण विभागावर टाकली असून, शिक्षण अधिकाऱ्याच्या भोंगळ कारभारामुळे ही नियुक्ती झाल्याचा ठपका ठेवला आहे. महापालिका आयुक्त रवींद्र जाधव यांनी शिक्षण अधिकाऱ्याला कारणे दाखवा नोटीस बजावली असून, येत्या २४ तासांत खुलासा न केल्यास कारवाई करण्याचा इशारा दिला आहे. “कर्तव्यात कसूर करून चुकीची माहिती दिल्याने ही चूक झाली,” असा स्पष्ट उल्लेख नोटीसमध्ये आहे. ही घटना निवडणूक यंत्रणेच्या डेटाबेस अपडेट आणि नियुक्ती प्रक्रियेत गंभीर त्रुटी दर्शवते. राज्य निवडणूक आयोगाच्या मार्गदर्शक तत्त्वांनुसार, निवडणूक कर्मचाऱ्यांच्या यादीत मृत व्यक्तींचा समावेश होऊ नये यासाठी अद्ययावत माहिती आवश्यक असते. मात्र, या प्रकरणात प्रशासनाच्या निष्काळजीपणामुळे हे घडले आहे.
