Raima Sen : चित्रपटसृष्टीत अनेक कलाकार सातत्याने काम करत असले तरी काही जण विश्रांती घेत पुन्हा नव्या जोमाने परत येतात. अशाच अभिनेत्रींपैकी एक म्हणजे रायमा सेन. दोन वर्षांच्या विश्रांतीनंतर ही प्रसिद्ध अभिनेत्री पुन्हा एकदा प्रेक्षकांच्या भेटीला येण्यासाठी सज्ज झाली आहे.

ती बऱ्याच काळापासून चित्रपटसृष्टीत कार्यरत आहे आणि तिच्या कुटुंबातील चित्रपटांमध्ये काम करणारी ती तिसऱ्या पिढीतील आहेत. आजी, सुचित्रा सेन, बंगाली चित्रपटसृष्टीतील एक आघाडीच्या आणि अत्यंत प्रतिष्ठित अभिनेत्री होत्या. देशातील पहिल्या आंतरराष्ट्रीय पुरस्कार विजेत्या अभिनेत्रीचा मान त्यांना मिळाला आहे.

रायमा सेनची आई मून मून सेन यादेखील एक प्रसिद्ध अभिनेत्री होत्या आणि त्यांनी अनेक चित्रपटांमध्ये काम केले आहे. तिची धाकटी बहीण रिया सेन हिनेही विविध भाषांतील चित्रपटांमध्ये काम केले आहे. रायमा सेनने ‘गॉडमदर’ या चित्रपटातून आपल्या कारकिर्दीला सुरुवात केली आणि आता तिने चित्रपटसृष्टीत 26 वर्षे पूर्ण केले आहेत.

ही अभिनेत्री दमन, चोखेर बाली, शक्ती, परिणीता, दस, एकलव्य, मनोरमा सिक्स फीट अंडर, सी कंपनी, मुखबीर, मुंबई कटिंग, तीन पट्टी, आय मी और में, 3 बॅचलर, कागज के फूल, आणि द वॅक्सीन वॉर यांसारख्या चित्रपटांमध्ये दिसली आहे. हिंदी व्यतिरिक्त ती बंगाली, मराठी, तेलुगू आणि मल्याळम चित्रपटांमध्ये देखील दिसली आहे.

पण अभिनेत्री काही काळापासून चित्रपटसृष्टीत दिसलेली नाही. तिचा शेवटचा चित्रपट ‘चलचित्रो द फेम फेटल’, 2024 मध्ये प्रदर्शित झाला होता. आता दोन वर्षांच्या विश्रांतीनंतर अभिनेत्री पुनरागमन करण्यास सज्ज झाली आहे. नुकत्याच दिलेल्या एका मुलाखतीत याबद्दल बोलताना ती म्हणाली, “हिंदी चित्रपटसृष्टीत परत येणे नेहमीच आनंददायी असते. मला हे कबूल करायलाच हवे की, यावेळी थोडा जास्त वेळ लागला.”

रायमा सेनबद्दल बोलायचे झाल्यास ती हंसल मेहता दिग्दर्शित ‘फॅमिली बिझनेस’ या नेटफ्लिक्स ओरिजिनल सीरिजमध्ये दिसणार आहे. यामध्ये अनिल कपूर आणि विजय वर्मा यांसारख्या दिग्गज कलाकारांसोबत रिया चक्रवर्ती, नेहा धुपिया आणि आकाश खुराना या कलाकारांचाही समावेश आहे. या सीरिजची घोषणा फेब्रुवारी 2026 मध्ये करण्यात आली होती. परंतु प्रदर्शनाची निश्चित तारीख अद्याप जाहीर करण्यात आलेली नाही.