Kas Pathar: पावसाळ्याच्या अखेरीस कास पुष्प पठारावर विविधरंगी रानफुलांचा बहर सुरु झाला असून, हिरवळीवर उमललेल्या फुलांनी पठाराला जणू रंगीबेरंगी गालिच्याचे रुप आले आहे. हा नयनरम्य फुलोत्सव अनुभवण्यासाठी पर्यटकांनी कासकडे मोठी गर्दी केली आहे. शनिवार, रविवार आणि गणेश चतुर्थीच्या सलग सुट्यांमुळे कास परिसर पर्यटकांनी फुलून गेला.

कास पठारावर चवर, तेरडा, गेंद आभाळी, नभाळी, नीलिमा, टूथब्रश, आमरी, सोनकी, भारंगी, विघ्नहर्ता, गवेली, जरतारी, बिरमिर, कंदील पुष्प, निसुरडी, अबोलिमा आणि फुलकांडी यांसह विविध प्रजातींची रानफुले उमलली आहेत. हिरवाईच्या कॅनव्हॉसवर ठून दिसणारे फुलांचे रंग आणि धुक्याची चादर यामुळे पठाराचे सौंदर्य अधिकच खुलून दिसत आहे. पर्यटकांच्या वाढत्या संख्येचे नियोजन करण्यासाठी वन समितीने विविध उपाययोजना केल्या आहेत. पर्यटकांना मार्गदर्शन, शिस्तबद्ध प्रवेश आणि आवश्यक सुविधा देण्यासाठी पुरुष, महिला, तरुण, मुले- मुली अशा एकूण १६८ स्वयंसेवकांची नियुक्ती करण्यात आली आहे.

टॉवरवरुन निरीक्षणाची सुविधा

दररोज ऑनलाइन प्रवेशाची मर्यादा तीन हजार पर्यटकांपर्यंत ठेवण्यात आली आहे. सलग सुट्यांमुळे ऑनलाइन बुकिंग लवकरच पूर्ण झाल्याने काही पर्यटकांनी ऑफलाइन प्रवेशाचा पर्याय स्वीकारला. कास तलाव परिसर तसेच एकीवच्या दिशेने वेण्णा खोऱ्याचे विहंगम दृश्य पाहण्यासाठी दोन वॉच टॉवर उभारण्यात आले आहेत. दुर्बिणीची सुविधाही उपलब्ध असल्याने येथून निसर्गरम्य परिसर न्याहाळण्यासाठी पर्यटकांची विशेष गर्दी होत आहे. दरम्यान, राजमार्ग ते कुमुदिनी तळे या सुमारे दोन किलोमीटर मार्गावर पर्यटकांच्या सोयीसाठी चार छोट्या इलेक्ट्रिक बस सुरू आहेत. गतवर्षी उपवनसंरक्षक अमोल सातपुते यांच्या संकल्पनेतून सुरू झालेल्या या बससेवेला पर्यटकांचा चांगला प्रतिसाद मिळत आहे.