प्रभात वृत्तसेवा राजगुरुनगर – राजगुरुनगर शहरातील होलेवाडी परिसरात असलेल्या श्री अपार्टमेंटमध्ये अज्ञात चोरट्यांनी सुनियोजित पद्धतीने घरफोडी करत तब्बल 68 लाख 2 हजार रुपयांचा ऐवज लंपास केल्याची खळबळजनक घटना उघडकीस आली आहे. या प्रकरणी खेड पोलीस ठाण्यात अज्ञात चोरट्यांविरोधात गुन्हा दाखल करण्यात आला असून पोलीस तपास सुरू आहे. खेड पोलीस ठाण्यात दाखल झालेल्या फिर्यादीनुसार, मोतीलाल कांतीलाल गदीया (वय 59, रा. श्री अपार्टमेंट, पाबळ रोड, होलेवाडी, राजगुरुनगर) हे आपल्या कुटुंबासह सदर ठिकाणी वास्तव्यास आहेत. दि. 2 जानेवारी 2026 रोजी रात्री सुमारे 8 वाजता गदीया कुटुंबीय अक्कलकोट येथे देवदर्शनासाठी भाड्याच्या वाहनाने गेले होते. घरातील सर्व दरवाजे, खिडक्या व सेफ्टी गेट व्यवस्थित बंद करून कुलूप लावण्यात आले होते. दरम्यान, दि. 3 जानेवारी रोजी दुपारी सुमारे 1.15 वाजता शेजारील नागरिकांनी फोनद्वारे घराचे तीन दरवाज्यांचे कुलूप तोडलेले असून दरवाजे उघडे असल्याची माहिती दिली. त्यानंतर नातेवाईकांनी घराची पाहणी केली असता कपाटे उचकटलेली, ड्रॉवर उघडे व घरातील सर्व साहित्य अस्ताव्यस्त अवस्थेत आढळून आले. कुटुंबीय रात्री राजगुरुनगरला परतल्यानंतर सविस्तर तपासणी केली असता घरातील सोन्याचे दागिने, चांदीची भांडी, टायटन कंपनीची घड्याळे तसेच सुमारे 9.50 लाख रुपयांची रोख रक्कम चोरीस गेल्याचे निष्पन्न झाले. चोरीस गेलेल्या दागिन्यांमध्ये हार, मंगळसूत्रे, बांगड्या, चैन, अंगठ्या, ब्रासलेट, लहान मुलांचे सोन्याचे दागिने तसेच चांदीचे ताट, ग्लास, वाट्या व नाणी यांचा समावेश आहे. पोलिसांच्या प्राथमिक तपासानुसार, 2 जानेवारी रात्री 8 ते 3 जानेवारी दुपारी 1.15 या कालावधीत अज्ञात चोरट्यांनी घराचे कुलूप तोडून आत प्रवेश केला आणि कपाटे फोडून मौल्यवान माल लंपास केला. एकूण चोरी गेलेल्या मालाची किंमत 68,02,000 रुपये असल्याचे फिर्यादीत नमूद करण्यात आले आहे. या घटनेमुळे राजगुरुनगर व होलेवाडी परिसरात भीतीचे वातावरण निर्माण झाले असून, वाढत्या घरफोड्यांबाबत नागरिकांनी तीव्र चिंता व्यक्त केली आहे. खेड पोलिसांनी घटनास्थळी पंचनामा केला असून परिसरातील सीसीटीव्ही फुटेजची तपासणी सुरू आहे. आरोपी सीसीटीव्हीमध्ये कैद झाल्याचे पोलिसांनी सांगितले.
