महुडे : भोर तालुक्यातील ग्रामीण भागात पावसाळ्यात विजेचा धक्का लागून शेतकरी आणि पाळीव जनावरांना प्राण गमवावे लागल्याच्या घटना ताज्या आहेत. असे असतानाही महुडे विभागातील ९ पैकी तब्बल ८ विद्युत रोहित्रे (ट्रान्सफॉर्मर) उघड्या आणि दुरवस्थेत असल्याने नागरिकांच्या जीवाला मोठा धोका निर्माण झाला आहे. ९ पैकी केवळ एकच ट्रान्सफॉर्मर सुरक्षित स्थितीत असल्याचे दिसून येत आहे.

महुडे विभागातील नांद वरचे, नांद खालचे, शेती डीपी नांद, महुडे खुर्द, महुडे बुद्रुक, दत्तवाडी, पिलानेवाडी आणि मोरेवाडी येथील ट्रान्सफॉर्मरची मोठी दुरवस्था झाली आहे. अनेक ठिकाणच्या डीपींचे दरवाजे (झाकणे) गायब झाले आहेत, तर काही ठिकाणचे दरवाजे तुटून मोडकळीस आले आहे.

डोंगर भागात माळरानावर तसेच शेताच्या बांधावर शेतकऱ्यांना गुरे चरण्यासाठी न्यावे लागते. याशिवाय मंदिर परिसर व माळरानावर लहान मुले खेळत असतात, तर महिला शेतकरी पाणवठ्यावर जात असतात. या परिसरातच हे उघडे ट्रान्सफॉर्मर असल्याने लहान मुले, शेतकरी, महिला आणि पाळीव जनावरांच्या सुरक्षेचा प्रश्न गंभीर बनला आहे. महावितरण प्रशासनाने याकडे दुर्लक्ष न करता लवकरात लवकर दुरुस्ती व संरक्षक उपाययोजना करावी, अशी तीव्र मागणी ग्रामस्थ सचिन सणस यांनी केली आहे.

महुडे विभागातील ब्राह्मणघर येथील ट्रान्सफॉर्मरला सुरक्षेसाठी दरवाजा बसवण्यात आला आहे. उर्वरित सर्व ठिकाणच्या उघड्या ट्रान्सफॉर्मरची पाहणी करून तिथे तातडीने आवश्यक ती उपाययोजना करण्याच्या सूचना महावितरण अधिकाऱ्यांना दिल्या आहेत.
– प्रवीण जगदाळे,जि. प. सदस्य.