पिंपरी (प्रतिनिधी) – कंपनीच्या ई-मेल आयडीमध्ये अफरातफर करून चाकण येथील एका कंपनीची तब्बल 65 लाखांची फसवणूक करण्यात आली. मात्र, पिंपरी चिंचवड आयुक्तालयातील सायबर सेलने तांत्रिक तपास करून ही सर्व रक्कम कंपनीला परत मिळवून दिली आहे.
सायबर सेलचे वरिष्ठ निरीक्षक सुधाकर काटे यांनी दिलेल्या माहितीनुसार, चाकण पिनॅकल इक्पिमेंट प्रा. लिमिटेड ही जर्मनी येथील एका कंपनीसोबत व्यापार करते. 16 मार्च रोजी जर्मनी कंपनीच्या मेल आयडीशी साधर्म्य असलेल्या मेल आयडीवरून चाकणच्या कंपनीला एक मेल आला.
त्यामध्ये बिल देण्यासाठीची बॅंक आणि खाते क्रमांक बदलले असल्याचे नमूद करण्यात आले होते. त्यानुसार चाकणच्या कंपनीने बदललेल्या बॅंक खात्यावर 65 लाख 67 हजार 780 रूपये ट्रान्सफर केले. पैसे पाठवल्यानंतर पैसे मिळाले का, याची खात्री करण्यासाठी जर्मन कंपनीच्या मुंबई प्रतिनिधीकडे विचारणा केली असता पैसे मिळाले नसल्याचे त्यांनी सांगितले.
सायबर सेलच्या अधिकाऱ्यानी तत्काळ जर्मन बॅंकेसोबत ई-मेलद्वारे पत्रव्यवहार करुन सदरच्या पैशांचा व्यवहार थांबविण्याबाबत कळविले. त्यानंतर जर्मन बॅंकेकडे पाठपुरावा करुन कंपनीची फसवणूक झालेली सर्व रक्कम परत मिळवून दिली. या व्यतिरिक्त लॉकडाऊन काळात अन्य तक्रादारांचेही सुमारे अडीच लाख सायबर सेलने परत मिळवून दिले आहेत.