Pakistan | Amritsar border – सीमा सुरक्षा दल सतर्क जवानांनी गुरुवारी रात्री एक उल्लेखनीय कामगिरी केली. अमृतसरच्या सीमावर्ती भागात अनेक घटनांमध्ये ६ पाकिस्तानी नार्को ड्रोन त्यांनी पाडले. यावेळी शेतात पडलेले हेरॉइनची चार पॅकेटसदेखील जप्त करण्यात आली आहेत.

बीएसएफच्या मते, १७ जुलैच्या रात्री, कर्तव्यावर तैनात असलेल्या सतर्क जवानांनी अमृतसर सीमेवर सतत ड्रोन घुसखोरी रोखली. जवानांनी त्वरित प्रतिसाद दिला आणि सीमेवर तैनात केलेल्या तांत्रिक प्रतिउत्तरात्मक उपाययोजना सक्रिय केल्या. त्यांच्या मदतीने, पाकिस्तानकडून येणारा प्रत्येक नार्को ड्रोन निष्क्रिय करण्यात आला.

त्यानंतर, बीएसएफने केलेल्या शोध मोहिमेत, पुलमोरन गावाजवळील शेतातून ४ डीजेआय मॅविक ३ क्लासिक ड्रोन आणि ३ पॅकेट संशयित हेरॉइन (एकूण वजन- १.७४४ किलो) जप्त करण्यात आले.

रात्री रोरानवाला खुर्द गावाजवळही हेरॉइनचे एक पॅकेट (एकूण वजन- ५९६ ग्रॅम) आणि डीजेआय मॅविक ३ क्लासिक ड्रोन जप्त केले. दहशतवादविरोधी उपाययोजनांमध्ये तांत्रिक हस्तक्षेप झाल्यामुळे हे ड्रोन क्रॅश झाले.

शुक्रवारी सकाळी, धानोई कलान गावाच्या परिसरात तांत्रिक दहशतवादविरोधी उपाययोजना सक्रिय केल्यावर आणखी एक डीजेआय मॅविक ३ क्लासिक ड्रोन अडवण्यात आला. जवानांनी तोही पाडला.

काही तासांच्या कालावधीत बीएसएफने केलेल्या कारवाईत, ६ डीजेआय मॅविक ३ क्लासिक ड्रोन आणि २.३४० किलो हेरॉइन जप्त करण्यात आले. यामुळे सीमेपलीकडे सक्रिय असलेल्या पाकिस्तानी नार्को-दहशतवाद सिंडिकेटला मोठा धक्का बसला आहे.