Manipur News – मणिपूरमध्ये बुधवारी सलग दोन भूकंप झाले. सकाळी ११.०६ वाजता झालेल्या भूकंपाची तीव्रता ५.७ रिष्टर स्केल इतकी होती. शिलाँगमधील प्रादेशिक भूकंपशास्त्र केंद्राच्या अधिकाऱ्यांनी दिलेल्या माहितीनुसार, भूकंपाचे केंद्र इंफाळ पूर्व जिल्ह्यातील यायरीपोकपासून ४४ किमी पूर्वेस आणि ११० किमी खोलीवर होते.

दुपारी १२.२० वाजता मणिपूरमध्ये ४.१ तीव्रतेचा दुसरा भूकंप झाला. भूकंपाचे केंद्रबिंदू राज्यातील कामजोंग जिल्ह्यात ६६ किलोमीटर खोलीवर होते. भूकंपानंतर मणिपूरमधील अनेक इमारतींना भेगा पडल्याचे दिसून आले. आसाम, मेघालय आणि अरुणाचल प्रदेशाच्या काही भागात भूकंपाचे धक्के जाणवले.

सोशल मीडियावर शेअर केलेल्या व्हिडिओंमध्ये थौबल जिल्ह्यातील वांगजिंग लामडिंग येथील एका शाळेच्या इमारतीला भेगा पडल्याचे दिसून आले. इथे वांशिक संघर्षांमुळे बाधित झालेल्यांसाठी मदत शिबिर चालवले जाते.

भूकंपाच्या वेळी शक्य तितके सुरक्षित रहा. भूकंपानंतर मोठा भूकंप येऊ शकतो याची जाणीव ठेवा. हळू हळू हालचाल करा, जवळच्या सुरक्षित ठिकाणी पोहोचण्यासाठी काही पावलांपर्यंत तुमची हालचाल मर्यादित करा आणि एकदा हादरे थांबले की, बाहेर पडणे सुरक्षित आहे याची खात्री होईपर्यंत घरातच रहा असे नागरिकांना सांगण्यात आले.