नायजर : नायजेरियातुन एक धक्कादायक बातमी समोर येत आहे. या ठिकाणच्या नायजर भागात बोट उलटून 26 प्रवाशांचा बुडून मृत्यू झाला असल्याचे सांगण्यात येत आहे. या अपघातात अनेक जण बेपत्ता झाले असून, काहींचा शोध सुरू आहे.  नायजेरियातील नायजर प्रांतातील मोकवा येथे बोटीतून प्रवास करताना बुडून मृत्यू झालेल्या लोकांमध्ये बहुतांश महिला आणि मुले असल्याची माहिती अधिकाऱ्यांनी दिली. या भागात गेल्या तीन महिन्यांतील हा दुसरा अपघात असल्याचे अधिकाऱ्यांनी सांगितले.

इंग्रजी वर्तमानपत्राने दिलेल्या वृत्तानुसार, नायजेरियाच्या नायजर राज्याच्या गव्हर्नरचे प्रवक्ते बोलगी इब्राहिम यांनी या दुर्घटनेविषयी माहिती दिली. याविषयी माहिती देताना इब्राहिम यांनी ,अपघात झालेल्या बोटीवर 100 हून अधिक लोक होते. बोटीत महिला आणि लहान मुलांचाही समावेश होता असे म्हटले आहे.

मोकवा नावाच्या ठिकाणी हा अपघात झाल्याचे प्रवक्त्याने सांगितले. इब्राहिम पुढे म्हणाले की, बोट दुर्घटनेत प्राण गमावलेले आणि बेपत्ता झालेले लोक धरण ओलांडून आपापल्या शेतात जात होते. अशा परिस्थितीत बहुतांश लोक शेतकरी असल्याचे मानले जाते. राज्यपालांचे प्रवक्ते बोलगी इब्राहिम यांनी सांगितले की, बोट दुर्घटनेत 26 जणांचा मृत्यू झाला आहे. मृत्युमुखी पडलेल्या लोकांमध्ये बहुतांश महिला आणि लहान मुले होती. अपघातातील सुमारे 30 जणांना वाचविण्यात यश आले आहे. नायजर राज्य आपत्कालीन व्यवस्थापन संस्थेच्या सहकार्याने सागरी पोलीस आणि स्थानिक गोताखोर पाण्यात बुडालेल्या लोकांचा शोध घेत आहेत.

नायजेरियाच्या या भागात यापूर्वीही असे अपघात झाले आहेत. काही महिन्यांपूर्वी जुलै महिन्यात बोट बुडाल्याने 100 जणांचा मृत्यू झाला होता. नायजर राज्यातील दुर्गम भागात हा अपघात झाला. या अपघाताचे कारण बोटीचे वजन जास्त असल्याचे अधिकाऱ्यांनी सांगितले होते. अलिकडच्या काळात नायजेरियात घडलेला हा अशा प्रकारचा सर्वात मोठा अपघात होता. या अपघातानंतर नायजेरियाच्या वाहतूक व्यवस्थेवर प्रश्न उपस्थित होऊ लागले आहेत.