Shankaracharya: ज्योतिष पीठाचे शंकराचार्य स्वामी अविमुक्तेश्वरानंद यांनी हिंदू धर्म आणि गोवंशाच्या रक्षणासाठी दोन लाखांहून अधिक सैनिकांची एक भव्य ‘चतुरंगिनी सेना’ उभारण्याची घोषणा केली आहे. वाराणसी येथे त्यांनी या योजनेचा आराखडा मांडला. या सैन्यात पारंपारिक शस्त्रास्त्रांसह आधुनिक शस्त्रांचाही समावेश असेल, असे त्यांनी स्पष्ट केले आहे. काय आहे ‘चतुरंगिनी सेना’? Shankaracharya शंकराचार्यांनी सांगितले की, महाभारतात ‘चतुरंगिनी सेने’चा उल्लेख आढळतो. यामध्ये पायदळ, घोडदळ, हत्ती आणि रथ अशा चार प्रमुख विभागांचा समावेश असेल. या सेनेत एकूण २,१८,००० सैनिक असतील. या सैन्यात पुरुष, महिला आणि तृतीयपंथी (Transgender) अशा सर्व घटकांना स्थान दिले जाईल, तसेच सर्व हिंदू जातींमधील लोकांचा यात सहभाग असेल. सेनेच्या शस्त्रागारात कुऱ्हाडीसारखी पारंपारिक शस्त्रे आणि आधुनिक हत्यारे देखील असतील. प्रयागराजमध्ये होणार शुभारंभ Shankaracharya या नव्या सेनेचा अधिकृत शुभारंभ पुढील वर्षी फेब्रुवारी महिन्यात मौनी अमावस्या निमित्त प्रयागराजमध्ये केला जाणार आहे. धर्म, संस्कृती आणि समाजाच्या संरक्षणासाठी ही पावले उचलली जात असल्याचे अविमुक्तेश्वरानंद यांनी समर्थकांसमोर सांगितले. हेही वाचा – लालू प्रसाद यादवांना दिल्ली उच्च न्यायालयाचा मोठा धक्का! ‘लँड फॉर जॉब्स’ प्रकरणातील याचिका फेटाळली प्रशासनाचा ‘वॉच’ आणि कायदेशीर पेच Shankaracharya शंकराचार्यांच्या या घोषणेनंतर उत्तर प्रदेश प्रशासन आणि पोलीस सतर्क झाले आहेत. वरिष्ठ पोलीस अधिकाऱ्यांच्या मते, विनापरवाना शस्त्रे बाळगणे किंवा त्यांचे सार्वजनिक प्रदर्शन करणे हे कायद्याचे उल्लंघन असून, अशा प्रकरणांत कठोर कायदेशीर कारवाई केली जाऊ शकते. प्रशासकीय सूत्रांनी दिलेल्या माहितीनुसार, या हालचालींवर बारीक लक्ष ठेवले जात आहे. वाद आणि आरोपांचे सावट Shankaracharya शंकराचार्य अविमुक्तेश्वरानंद सध्या विविध कारणांमुळे चर्चेत आहेत. मुख्यमंत्री योगी आदित्यनाथ यांच्याशी वाद सुरु आहे. माघ मेळ्यादरम्यान पालखीला परवानगी न मिळाल्यावरून त्यांनी मुख्यमंत्र्यांवर टीका केली होती. याला उत्तर देताना मुख्यमंत्र्यांनी ‘कालनेमी’ (वेषांतर करणारा राक्षस) अशा शब्दांत अप्रत्यक्ष टोला लगावला होता. तसेच गेल्या महिन्यात आशुतोष ब्रह्मचारी महाराज यांच्या तक्रारीवरून अविमुक्तेश्वरानंद यांच्यावर पोक्सो (POCSO) कायद्यांतर्गत बाल शोषणाचे गुन्हे दाखल करण्यात आले आहेत. प्रयागराजमधील आश्रमात बटुकांचे लैंगिक शोषण झाल्याचा आरोप त्यांच्यावर आहे. शंकराचार्यांचे स्पष्टीकरण: स्वत:वरील सर्व आरोप फेटाळून लावताना शंकराचार्यांनी म्हटले आहे की, हे सनातन धर्माला बदनाम करण्यासाठी रचलेले षडयंत्र आहे. या प्रकरणात विरोधी पक्षांनी शंकराचार्यांच्या समर्थनार्थ भूमिका घेतली आहे. दरम्यान, एकीकडे ‘चतुरंगिनी सेने’च्या माध्यमातून शक्ती प्रदर्शनाची तयारी, तर दुसरीकडे कायदेशीर कचाटा आणि गंभीर आरोपांचे सावट, अशा दुहेरी पेचात शंकराचार्य सापडले आहेत.
