आरोग्य यंत्रणा सतर्क; सर्वाधिक संशयित पाटण व फलटणमध्ये

सातारा – करोनानंतर आता राज्यात एन्फ्लूएंझाचा शिरकाव झाला असून जिल्ह्यात या आजाराचे 199 संशयित रुग्ण आढळून आल्याने आरोग्य विभाग हडबडला आहे. पाटण व फलटण तालुक्‍यात या आजाराचे सर्वाधिक संशयित असून या आजाराने अद्याप कोणाचाही मृत्यू झालेला नाही. या पार्श्‍वभूमीवर आरोग्य विभागाकडून जनजागृती करण्यात येत असून नागरिकांनी घाबरुन न जाता आरोग्य विभागाच्या सूचनांचे पालन करावे, असे आवाहन आरोग्य विभागामार्फत करण्यात आले आहे.

सध्या राज्यात फ्लू अर्थात एच 3 एन 2 या एन्फल्यूएंझाची साथ असून एन्फल्युएंझा आजार विषाणूमुळे होणारा आजार आहे. तातडीने उपचार सुरु केल्यास आजार लवकर बरा होण्यास मदत होते. त्यामुळे लक्षणे आढळल्यास वेळीच उपचार सुरु करावेत. या आजाराविषयी नागरिकांनी खबरदारी घेण्याची गरज आहे. वर्गवारी अ मध्ये स्वॅबची आवश्‍यकता नाही. घरच्याघरी विलगीकरण करावे. 24 ते 48 तासांमध्ये लक्षणे वाढल्यास ऑसेल्टामिवीर सुरु करावी. वर्गवारी ब मध्ये निवडक अतिजोखमीच्या रुग्णांचा स्वॅब घ्यावा. ऑसेल्टामिवीर सुरु करावी. घरी विलगीकरण करावे. वर्गवारी क मध्ये प्रत्येक रुग्णांचा स्वॅब घ्यावा. ऑसेल्टामिवीर सुरु करावी. रुग्णालयात भरती व्हावे, असे आवाहन आरोग्य विभागामार्फत करण्यात आले आहे.

जिल्ह्यात या आजाराचे संशयित रुग्ण सापडण्याचे प्रमाण वाढले आहे. जावळी 6, कराड 16, खटाव 2, कोरेगाव 11, महाबळेश्‍वर 2, माण 6, पाटण 73, फलटण 59, सातारा 9, वाई 15 असे 199 संशयित आढळून आले आहेत. या आजाराने अद्याप कोणाचा मृत्यू झाला नसल्याचे प्रशासनाच्यावतीने सांगण्यात येत आहे. मात्र, एवढ्या मोठ्या प्रमाणात संशयित सापडल्याने आरोग्य विभाग सतर्क झाला आहे. एन्फल्युएंझा उपचारासाठी आवश्‍यक पायाभूत सुविधा असणाऱ्या राज्यातील सर्व खासगी रुग्णालयांना मान्यता आहे. याकरिता वेगळया परवानगीची आवश्‍यकता नाही. शाळा व शैक्षणिक संस्थामध्ये अशी लक्षणे आढळल्यास विद्यार्थ्यांची तपासणी करून घ्यावी. लक्षणे आढळणाऱ्या मुलांच्या पालकांना घरातील इतर कुटुंब सदस्यांची तपासणी करण्याच्या सूचना कराव्यात, अशा सूचना आरोग्य विभागाकडून करण्यात येत आहेत.

या आजारात अतिजोखमीच्या व्यक्ती
एन्फल्युएंझा हा आजार अतिजोखमीच्या व्यक्तीमध्ये गंभीर स्वरुप धारण करु शकतो. 5 वर्षाखालील मुले (विशेष करुन 1 वर्षाखालील बालके), 65 वर्षावरील ज्येष्ठ नागरिक, गरोदर माता, उच्च रक्तदाब किंवा इतर हदयरोग, मधुमेह, स्थूलत्व, फुप्प्फुस, यकृत, मूत्रपिंड यांचे आजार असणाऱ्या व्यक्ती, चेतासंस्थेचे विकार असणाऱ्या व्यक्ती, प्रतिकार शक्तीचा ऱ्हास झालेली व्यक्ती, दीर्घकाळ स्टिरॉईड औषधे घेणाऱ्या व्यक्ती.

ही आहेत आजाराची लक्षणे
ताप, घसादुखी, घशाला खवखव, खोकला, नाक गळणे, अंगदुखी, डोकेदुखी, बालरुग्णांमध्ये सौम्य व मध्यम स्वरुपाचा ताप आढळतो, घसादुखी असणऱ्या बाळांमध्ये तोंडातून अतिप्रमाणात लाळ गळताना आढळते, काही रुग्णांना जुलाब व उलट्या होतात. सौम्य ताप ( 38 अंश सेल्सिअस पेक्षा कमी) खोकला, घशाला खवखव, अंगदुखी, डोकेदुखी, जुलाब, उलट्या. वरील लक्षणांशिवाय तीव्र घसादुखी, घशाला सूज व ताप ( 38 अंश सेल्सिअस पेक्षा जास्त), वरील लक्षणांशिवाय धाप लागणे, छातीत दुखणे, खोकल्यावाटे रक्त पडणे, रक्तदाब कमी होणे, मुलांची चिडचिड व झोपाळूपणा.

इन्फल्युएंझा टाळण्यासाठी हे करा
वारंवार साबण व स्वच्छ पाण्याने हात धुवा, पौष्टिक आहार घ्या, लिंबू, आवळा, मोसंबी, संत्री, हिरव्या पालेभाज्या यांसारख्या आरोग्यदायी पदार्थांचा आहारात वापर करा. धुम्रपान टाळा, पुरेशी झोप आणि विश्रांती घ्या, भरपूर पाणी प्यावे.

========================