Home sales :  प्रॉपइक्विटीच्या माहितीनुसार, जागतिक आर्थिक अनिश्चितता असूनही, प्रमुख नऊ शहरांमध्ये एप्रिल-जून दरम्यान घरांची विक्री 19 टक्क्यांनी वाढून 1,12,458 युनिट्सवर पोहोचली. मुंबई, नवी मुंबई, ठाणे, दिल्ली-एनसीआर, बंगळूर, हैदराबाद, चेन्नई, पुणे आणि कोलकाता या नऊ शहरांमध्ये मागील वर्षी याच कालावधीत 94,864 युनिट्सची विक्री झाली होती.

एप्रिल-जून कालावधीत निवासी मालमत्तांचा नवीन पुरवठा वार्षिक 43 टक्क्यांनी वाढून 1,17,609 युनिट्सवर पोहोचला. प्रॉपइक्विटीचे संस्थापक समीर जासुजा म्हणाले, मध्य पूर्वेतील भू-राजकीय अनिश्चितता असूनही भारतीय गृहनिर्माण बाजारपेठ चिवट राहिली आहे. दक्षिणेकडील बाजारपेठा विकासात आघाडीवर आहेत, तर मुंबई आणि नवी मुंबईमध्येही जोरदार मागणी दिसून आली आहे. ठाणे आणि दिल्ली-एनसीआरसारख्या काही भागांमध्ये तुलनेने कमी व्यवहार झाले असले तरी, एकूण बाजारपेठेतील वातावरण सकारात्मक आहे.

आकडेवारीनुसार, बंगळूरमध्ये एप्रिल-जूनमध्ये घरांची विक्री मागील वर्षीच्या याच कालावधीतील 14,676 युनिट्सवरून वाढून 21,516 युनिट्स झाली.
चेन्नईमध्ये विक्री 5,354 युनिट्सवरून वाढून 6,323 युनिट्स झाली.

हैदराबादमध्ये निवासी मालमत्तांची विक्री 11,815 युनिट्सवरून वाढून 14,410 युनिट्स झाली. मुंबईत विक्री 8,006 युनिट्सवरून वाढून 10,561 युनिट्स झाली, तर नवी मुंबईत घरांची विक्री 6,833 युनिट्सवरून वाढून 11,029 युनिट्स झाली.

ठाण्यात विक्री 14,832 युनिट्सवरून 16,386 युनिट्सपर्यंत वाढली. पुण्यात घरांची विक्री 17,196 युनिट्सवरून 18,737 युनिट्सपर्यंत वाढली. मात्र, दिल्ली-एनसीआरमध्ये विक्री 11,703 युनिट्सवरून 10,082 युनिट्सपर्यंत घसरली. कोलकातामध्ये, मागील वर्षीच्या याच कालावधीतील 4,449 युनिट्सच्या तुलनेत एप्रिल-जूनमध्ये विक्री 3,414 युनिट्सपर्यंत घसरली.

या अहवालावर भाष्य करताना, प्रॉपर्टी फर्स्ट रियल्टीचे संस्थापक आणि सीईओ भावेश कोठारी यांनी बंगळूरमधील विक्री वाढीचे श्रेय शहरातील पायाभूत सुविधांचा विस्तार आणि रोजगार निर्मितीला दिले. सर्व किंमत श्रेणींमध्ये अंतिम वापरकर्ते आणि गुंतवणूकदारांकडून मागणी मजबूत आहे, असेही ते म्हणाले.

एम3एम इंडियाचे अध्यक्ष रॉबिन मंगला म्हणाले की, घरांच्या विक्रीतील 19 टक्क्यांची वाढ हा ग्राहकांचा टिकून राहिलेला आत्मविश्वास आणि निवासी रिअल इस्टेट क्षेत्राची मूळ ताकद दर्शवणारा एक मजबूत निर्देशक आहे.

संजीवनी ग्रुपचे अध्यक्ष आणि संस्थापक, उमेश गौडा एचए म्हणाले, मध्य पूर्वेतील भू-राजकीय तणाव असूनही भारताच्या गृहनिर्माण बाजारपेठेने उल्लेखनीय लवचिकता दाखवली आहे. ते पुढे म्हणाले की, मजबूत आर्थिक पाया, सातत्यपूर्ण धोरणात्मक पाठिंबा आणि सुदृढ देशांतर्गत मागणी यामुळे हे क्षेत्र बाह्य अनिश्चिततेपासून मोठ्या प्रमाणात सुरक्षित राहण्यास मदत झाली आहे.