Satara: जिल्हा परिषदेचे सदस्य कामेश कांबळे यांनी खेड गटातील जिल्हा परिषदेच्या प्राथमिक शाळांमधील एक हजार ८७२ विद्यार्थ्यांना मोफत शालेय साहित्य व सायकल वाटप केले. या उपक्रमामुळे विद्यार्थ्यांना शैक्षणिक साहित्याची मदत मिळण्याबरोबरच शिक्षणासाठी प्रोत्साहन देण्यात आले. त्यामुळे शाळेच्या पहिल्याच दिवशी विद्यार्थ्यांच्या चेहऱ्यावर आनंद निर्माण झाला.

जिल्हा परिषद शाळांचा पट वाढवावा, विद्यार्थ्यांच्या शैक्षणिक प्रगतीला चालना मिळावी, आर्थिकदृष्ट्या दुर्बल कुटुंबांवरील शैक्षणिक खर्चाचा भार कमी व्हावा आणि विद्यार्थ्यांनी नियमितपणे शाळेत जावे या उद्देशाने कामेश कांबळे यांनी हा उपक्रम राबवला. विद्यार्थ्यांना वह्या, पुस्तके, दप्तर, पाणी बाटली तसेच गरजेनुसार सायकलींचे वितरण करण्यात आले. ग्रामीण भागातील विद्यार्थ्यांच्या शैक्षणिक गरजा ओळखून राबविण्यात आलेला हा उपक्रम इतर लोकप्रतिनिधींसाठीही प्रेरणादायी ठरत असल्याची भावना नागरिकांनी व्यक्त केली.

विद्यार्थ्यांना शिक्षणासाठी मेहनत घेण्याचे आवाहन यावेळी मान्यवरांनी केले. विद्यार्थ्यांच्या सर्वांगीण विकासासाठी भविष्यातही असे उपक्रम सुरू ठेवणार असल्याचे कामेश कांबळे यांनी सांगितले. कामेश कांबळे आणि मित्र समूहाच्यावतीने खेड, क्षेत्र माहुली, संगम माहुली, चिंचणेर, सोनगाव सं. निंब, महागाव, कातकरी वस्ती, खावली, प्रतापसिंहनगर, धनगरवाडी, येथील सर्व शाळांना भेट देऊन विद्यार्थ्यांना साहित्याचे वितरण करण्यात आले. यावेळी दिलीपराव कांबळे,डं पंचायत समितीच्या सदस्य पूजा गायकवाड (खेड) व राणी पवार (क्षेत्रमाहुली), माजी सभापती मिलिंद कदम, माजी सरपंच पिंटू गायकवाड, सुजित पवार, माजी उपसरपंच सुधीर काकडे, ग्रामपंचायत सदस्य निखिल यादव, गौरव जाधव यांच्यासह पदाधिकारी, ग्रामस्थ, विद्यार्थी उपस्थित होते.