Russia-Ukraine War : रशियाने युक्रेनची राजधानी कीव्ह आणि आसपासच्या भागांवर रात्री क्षेपणास्त्रे आणि ड्रोनच्या साहाय्याने जोरदार हल्ला केला. अनेक तास चाललेल्या या हल्ल्यात किमान १६ जणांचा मृत्यू, तर सुमारे ४० जण जखमी झाल्याची माहिती युक्रेनच्या अधिकाऱ्यांनी गुरुवारी दिली. या हल्ल्यामुळे राजधानीत मोठ्या प्रमाणावर विध्वंस झाला असून, अनेक निवासी भागांना फटका बसला.

युक्रेनच्या हवाई दलानुसार, रशियाने बॅलिस्टिक आणि क्रूझ क्षेपणास्त्रांसह वेगाने उडणाऱ्या जेट-चालित ड्रोनचा वापर केला. देशभरातील २८ ठिकाणांना लक्ष्य करण्यात आले असून, कीव्ह हे या हल्ल्याचे मुख्य लक्ष्य होते. राष्ट्राध्यक्ष वोलोदिमिर झेलेन्स्की यांनी हल्ल्याला “प्रचंड” संबोधत, रशियाने नागरी पायाभूत सुविधांचे जास्तीत जास्त नुकसान करण्याच्या उद्देशाने त्याची पूर्वतयारी केल्याचा आरोप केला.

कीव्हमधील डार्नित्स्की, स्वियातोशिन्स्की आणि सोलोमियांस्की जिल्ह्यांतील १२ ठिकाणांचे नुकसान झाले. निवासी इमारती, वैद्यकीय केंद्र आणि शैक्षणिक संस्थेलाही फटका बसला. सोलोमियांस्की जिल्ह्यात नऊ मजली निवासी इमारतीचे वरचे दोन मजले उद्ध्वस्त झाले.

ढिगाऱ्याखाली अडकलेल्या नागरिकांच्या सुटकेसाठी बचाव पथकांनी तातडीने मोहीम राबवली. रशियाच्या बॅलिस्टिक क्षेपणास्त्रांचा सामना करण्यासाठी युक्रेनकडे अमेरिकन बनावटीच्या ‘पॅट्रियट’ इंटरसेप्टर्सची कमतरता आहे. त्यामुळे झेलेन्स्की यांनी मित्रदेशांकडे अधिक हवाई संरक्षण प्रणाली आणि इंटरसेप्टर्स देण्याची मागणी केली आहे.

७२६ ड्रोन पाडल्याचा दावा

दरम्यान, रशियाच्या संरक्षण मंत्रालयाने कीव्हमधील औद्योगिक ठिकाणे, ड्रोन उत्पादन केंद्रे, दारूगोळा डेपो आणि लॉजिस्टिक केंद्रांना लक्ष्य केल्याचा दावा केला. तसेच रात्रीच्या हल्ल्यात युक्रेनचे ७२६ ड्रोन पाडल्याचे रशियाने म्हटले; मात्र या कारवाईत जीवितहानी किंवा मालमत्तेच्या नुकसानीची माहिती दिली नाही.

हल्ल्यानंतर युक्रेनच्या शेजारील देशांमध्येही सतर्कता वाढली. पोलंडने लढाऊ विमाने आणि हवाई संरक्षण यंत्रणा सक्रिय केली. रोमानियात युक्रेनच्या सीमेजवळ एक ड्रोन कोसळला, तर मोल्दोव्हाने आपल्या हवाई क्षेत्रात अनधिकृत ड्रोन घुसल्याचे सांगितले.