शिवपुरी (मध्य प्रदेश) – मध्यप्रदेशात आता आणखी 12 चित्ते आणले जाणार आहेत. या आधी या राज्यात नामिबीया येथून आठ चित्ते आणण्यात आले आहेत. आता दक्षिण आफ्रिकेतून पाच माद्यांसह तब्बल बारा चित्ते आणले जात आहेत आणि 18 फेब्रुवारी रोजी मध्य प्रदेशातील श्‍योपूर जिल्ह्यातील कुनो राष्ट्रीय उद्यानात ते सोडले जातील, असे प्रधान मुख्य वनसंरक्षक जे एस चौहान यांनी सांगितले.
या चित्त्यांपैकी नऊ चित्ते दक्षिण आफ्रिकेच्या रुईबर्ग येथून आणले जात आहेत आणि तीन चित्ते थिंडा येथून आणले आहेत.

नव्याने येणाऱ्या चित्त्यांच्या व्यवस्थेबाबत माहिती देताना चौहान म्हणाले, “आम्ही सर्व तयारी पूर्ण केली आहे. आम्ही पुरेसा क्वारंटाईन झोन तयार केला आहे. मागील वेळेपेक्षा या वेळी क्वारंटाईन एन्क्‍लोजर थोड्या अंतरावर बांधले गेले आहेत. दोन जुने क्वारंटाइन एन्क्‍लोजर देखील वापरले जात आहेत आणि आम्ही ते निर्जंतुकीकरण केले आहे.

उर्वरित नवीन संलग्नकांची देखील अनेक वेळा तपासणी करण्यात आली आहे. हे चित्ते प्रथम ग्वाल्हेर येथे पोहोचतील आणि त्यानंतर गेल्यावेळेप्रमाणेच त्यांना हवाई दलाच्या हेलिकॉप्टरमधून कुनो पार्क येथे आणले जाईल. या आधी आणलेले चित्ते पुर्ण तंदुरूस्त असल्याचेही त्यांनी सांगितले.