नवी दिल्ली :  गेल्या तीन वर्षांत देशभरातील 1,5,902 तरूण भारतीय सैन्यात दाखल झाले आहेत. यात महाराष्ट्रातील 11,866 तरुणांचा समावेश आहे, अशी माहिती केंद्रीय संरक्षण राज्यमंत्री श्रीपाद नाईक यांनी आज लोकसभेमध्ये लेखी उत्तरात ही माहिती दिली आहे.

देशातील तरूण मोठ्या प्रमाणात भारतीय सेनेत दाखल झाल्याचे चित्र आहे. भारतीय सेनेत गेल्या तीन वर्षात झालेल्या विविध रिक्त पदांच्या सैन्य भरतीमध्ये 30 राज्य व केंद्रशासीत प्रदेशांतील तसेच नेपाळमधील सरासरी 95 टक्के तरूण दाखल झाले आहेत. यात एकट्या महाराष्ट्रातील 11 हजार 866 तरुणांचा समावेश आहे.

वर्ष 2016-17 मध्ये महाराष्ट्रातील 3 हजार 980 तरूण , वर्ष 2017-18 मध्ये 3 हजार 836 आणि वर्ष 2018-19 मध्ये 4 हजार 50 तरुण भारतीय सैन्यात दाखल झाले आहेत. भारतीय सैन्यात वर्ष 2016-17 मध्ये 52 हजार 86 तरूण दाखल झाले, वर्ष 2017-18 मध्ये 49 हजार 438 तर वर्ष 2018-19 मध्ये 53 हजार 378 दाखल झाले आहेत.