पुणेः १ फेब्रुवारीला देशाचा २०२५-२६ चा अर्थसंकल्प केंद्रीय अर्थमंत्री निर्मला सितारमण यांनी संसदेत सादर केला. या अर्थसंकल्पात एनडीए सरकारने मोठ्या घोषणा जाहीर केल्या आहेत. यामुळे आता महाराष्ट्र राज्याचा अर्थसंकल्पात कोणत्या घोषणा महायुती सरकार करते याकडे राज्यातील १२ कोटी जनतेचे लक्ष लागलेले आहे.

येत्या ३ मार्चपासून राज्याचे अर्थसंकल्पीय अधिवेशनाला सुरूवात होणार आहे. १० मार्च या दिवशी राज्याचे अर्थमंत्री अजित पवार हे विधिमंडळात राज्याचा २०२५-२६ चा अर्थसंकल्प सादर करणार आहे. ३ मार्च ते २१ मार्च या कालावधीत विधीमंडळाच्या अर्थसंकल्पीय अधिवेशाला सुरूवात होणार आहे. विधानसभेच्या निवडणुकीनंतर राज्यात मुख्यमंत्री देवेंद्र फडणवीस यांच्या नेतृत्वाखालील महायुतीचे सरकार सत्तेवर आहे. यामुळे अर्थसंकल्पात सर्वसामान्य नागरिकांना दिलासा मिळणार का याकडे सगळ्यांचे लक्ष लागलेले आहे.

राज्यातील कर्जमाफी, सोयाबीन आणि कापूस दरवाढ, पीक विमा, शेतकऱ्यांसाठीच्या योजना, मध्यवर्गीयांची कर कमात, बेरोजगार तरुणांसाठी भत्ता तसेच शासकीय आस्थापनातील रिक्त असलेल्या पदांची भरती, गृहणींसाठींच्या घोषणा आदी मुद्यांवर या अर्थसंकल्पात कोणाच्या पदरी काय पडते हे पाहणे महत्वाचे असणार आहे. आगामी स्थानिक स्वराज्य संस्थांच्या निवडणुकीमुळे या अर्थसंकल्पात मोठ्या घोषण जाहीर होणार असल्याचे अर्थतज्ञ सांगत आहेत.

हप्ता वाढणार का?

विधानसभा निवडणुकीच्या तोंडावर राज्यात महायुती सरकारने मुख्यमंत्री माझी लाडकी बहिण योजना सुरू केली. निवडणुकीच्या निकालात याच लाडकी बहिणी गेम चेंजर ठऱल्या आणि पुन्हा एकदा सत्तेच्या खुर्चीवर महायुतीचे सरकार विराजमान झाले. सुरूवातीला दर महिन्याला लाडकी बहिण योजनेच्या माध्यमातून महिलांना १५०० रुपये देण्यास सुरूवात झाली. या हप्तामध्ये आणखी वाढ करून दर महिन्याला २१०० रुपये हप्ता देण्यात येईल, अशी घोषणा करण्यात आली. प्रत्यक्षात मात्र, याची अंमलबजावणी करण्यात आलेली नाही. यामुळे या अर्थसंकल्पात लाडकी बहिणी योजनेच्या हप्तामध्ये वाढ केली जाणार का, याकडे राज्यातील लाडकी बहिणी योजनेचा लाभ घेणाऱ्या लाभार्थ्यांचे लक्ष लागलेले आहे.