Pakistan – पाकिस्तानमधील पंजाब प्रांतात सोशल मीडियावर सक्रिय असलेल्या ११ कार्यकर्त्यांना अटक करण्यात आली आहे. सोशल मीडियावर लष्कराविरोधात पोस्ट करणे आणि समाजामध्ये असंतोषाला चिथावणी दिल्याबद्दल पंजाब प्रांताच्या वेगवेगळ्या शहरांमधून ११ जणांना अटक केली गेल्याचे राष्ट्रीय सायबर गुन्हे अन्वेषण संस्थेच्या प्रवक्त्याने सांगितले.

चिथावणीखोर संदेश पसरवणे, सरकारी संस्थांविरोधात विशेषतः पाक लष्कराविरोधात सोशल मीडियावरून असंतोष पसरवण्याच्या संशयावरून गुरुवारी ठिकठिकाणी छापे घातले गेले आणि या सर्वांना अटक केली गेली आहे.

यातील तिघांना लाहोर शहरातून, तिघांना फेसलाबादेतून, चौघांना मुलतानमधून तर एकाला गुरजनवाला येथून ताब्यात घेण्यात आले आहे. त्यांच्या नेटवर्कची माहिती मिळवण्यासाठी डिजीटल पुरावे आणि सोशल मीडियाचे रेकॉर्ड जमा केले जात आहेत.

त्यांच्याविरोधात इलेक्ट्रॉनिक गुन्हे प्रतिबंधक कायद्याच्या विविध कलमांखाली गुन्हे दाखल केले गेले आहेत, असे या प्रवक्त्याने सांगितले.

अटक केलेल्यांपैकी काही जण इम्रान खान यांच्या पाकिस्तान तेहरीक-ए-इन्साफ पक्षाशी संबंधित असल्याचा संशय आहे. या महिन्याच्या सुरुवातीला याच आरोपाखाली १३ जणांना अटक केली गेली होती.