Vikram Misri : केंद्र सरकारने परराष्ट्र सचिव विक्रम मिस्री (Vikram Misri) यांना एक वर्षाची मुदतवाढ दिली आहे. त्यांचा कार्यकाळ आता पुढील वर्षीच्या १४ जुलैपर्यंत असेल आहे. चीनविषयक बाबींचे तज्ज्ञ मानले जाणारे मिस्री यांची या पदावर जून २०२४ मध्ये नियुक्ती करण्यात आली होती.

मंत्रिमंडळाच्या नियुक्ती समितीने १४ जुलै २०२६ नंतरच्या एका वर्षाच्या कालावधीसाठी म्हणजेच १४ जुलै २०२७ पर्यंत मुदतवाढ देण्यास मंजुरी दिली आहे. या नियमात संरक्षण सचिव, परराष्ट्र सचिव, गृह सचिव, इंटेलिजन्स ब्युरोचे संचालक, रॉचे सचिव आणि इतर काही अधिकाऱ्यांसाठी वयाच्या ६० वर्षांनंतरही सेवेत मुदतवाढ देण्याची तरतूद आहे.

१९८९ च्या बॅचचे भारतीय परराष्ट्र सेवेतील अधिकारी असलेले मिस्री हे परराष्ट्र सचिव म्हणून नियुक्ती होण्यापूर्वी उप-राष्ट्रीय सुरक्षा सल्लागार म्हणून कार्यरत होते. इंद्रकुमार गुजराल, डॉ. मनमोहन सिंग आणि नरेंद्र मोदी या तीन पंतप्रधानांचे खासगी सचिव म्हणून काम करण्याचा दुर्मिळ मान त्यांना मिळाला आहे.

उप-राष्ट्रीय सुरक्षा सल्लागार म्हणून नियुक्ती होण्यापूर्वी मिस्री यांनी २०१९ ते २०२१ या काळात चीनमधील भारताचे राजदूत म्हणून काम पाहिले होते. जून २०२० मधील गलवान खोऱ्यातील संघर्षानंतर भारत आणि चीन यांच्यातील तणाव मोठ्या प्रमाणावर वाढला होता; त्यानंतर झालेल्या वाटाघाटींमध्ये मिस्री यांनी महत्त्वाची भूमिका बजावली होती.