Rahul Gandhi – मुख्य निवडणूक आयुक्त ज्ञानेश कुमार यांच्या राजीनाम्यासाठी इंडिया आघाडीचे खासदार आक्रमक झाले आहेत. मंगळवारी आकाशवाणी भवन परिसरात 8 तास ठिय्या आंदोलन केल्यानंतर आज पुन्हा एकदा खासदारांना जंतरमंतरवर आंदोलन करायचे होते.

मात्र पोलिसांनी खासदारांच्या बस अडवल्यानंतर लोकसभा विरोधी पक्षनेते राहुल गांधी आणि खासदार प्रियंका गांधी यांनी ठिय्या आंदोलनाला सुरुवात केली. यावेळी दिल्ली पोलिसांनी पुन्हा एकदा दोन्ही नेत्यांना ताब्यात घेतल्‍याने देशाच्‍या राजधानीत दुसऱ्या दिवशीही राजकीय वातावरण तापले होते.

काँग्रेसचे राष्ट्रीय अध्यक्ष मल्लिकार्जुन खर्गे यांनी इंडिया आघाडीच्या खासदारांना जनपथवरील सागर रत्ना रेस्टॉरंटमध्ये बोलावले होते. या ठिकाणी सर्व खासदारांनी जेवण केले आणि आंदोलनाची पुढील दिशा ठरवली. इंडिया आघाडीची बैठक होत असल्याने पोलिसांनी आधीच बाहेर बंदोबस्त ठेवला होता. तसेच सागर रत्ना रेस्टॉरंटपासून जंतरमंतर अवघ्या 100 मीटरच्या अंतरावर आहे. त्यामुळे जंतरमंतरवर देखील पोलिसांचा मोठा बंदोबस्त ठेवण्यात आला होता.

मात्र, पोलिसांच्या कारवाईला न जुमानता विरोधक हॉटेलमधून बाहेर पडले आणि बसमधून थेट जंतरमंतरकडे रवाना झाले. मात्र पोलिसांनी खासदारांच्या बस जागोजागी रोखल्या. त्यामुळे राहुल गांधी आक्रमक झाले आणि ते रस्तावर उतरले. यावेळी प्रियांका गांधी यांनी हातात संविधानाची प्रत घेऊन इतर महिला नेत्यांसह रस्त्यावरच ठाण मांडले.

राहुल गांधी आंदोलनावर ठाम होते आणि ते जंतरमंतरकडे पायी निघाले. पण पोलिसांनी त्यांना रोखले. त्यामुळे राहुल गांधी यांनी ठिय्या आंदोलनाला सुरुवात केली. मात्र पोलिसांनी पुन्हा रोखल्यावर प्रियंका गांधींसह कार्यकर्त्यांनी रस्त्यावर झोपून आंदोलनाला सुरुवात केली. अखेर राहुल गांधी आणि प्रियंका गांधी दोन्ही नेते ऐकत नसल्याने दिल्ली पोलिसांनी त्‍यांना ताब्यात घेतले. त्‍यानंतर काही वेळाने त्‍यांना सोडून देण्‍यात आले.