पुणे – दि ब्लाइंड वेल्फेअर ऑर्गनायझेशन या संस्थेच्या वतीने ज्या विद्यार्थ्यांना वसतिगृहात प्रवेश मिळाला नाही अशा 145 विद्यार्थ्यांना पत्रकार भवन पुणे येथे शिष्यवृत्ती वितरण कार्यक्रमाचे आयोजन करण्यात आले होते. याप्रसंगी सचिन आपटे बोलत होते.

आपल्या भाषणात आपटे पुढे म्हणाले की, विद्यार्थ्यांना शिक्षणासाठी प्रोत्साहन दिले व त्यांनी सकारात्मक दृष्टिकोन ठेवला तर त्यांच्यातील काही विद्यार्थी श्रीकांत बोल्ला यांच्यासारखे उद्योजक देखील होऊ शकतात.

अनेक अडचणी येतील त्याच्यावर मात करायला हवं जे आपल्याला सहजासहजी मिळते त्याची आपल्याला जाणीव नसते याची कल्पना त्यांनी विद्यार्थ्यांना आपल्या मनोगतातून दिली. संस्थेमार्फत होऊ घातलेल्या इंग्रजी माध्यमाच्या शाळेकरीता एक ते दोन खोल्या बांधून देण्याकरिता निश्चित मदत करू असे आश्वासन दिले.

आपल्या उराशी असलेले स्वप्न पूर्ण करण्यास कॉसमॉस बँक व माझ्या ओळखीने सहकार्य करू असे आपटे यांनी विशद केले. कॉसमॉस बँकेने जानेवारी 2026 मध्ये आपल्या वर्धापन दिनानिमित्त चार अंध व्यक्तींना नोकरीत सामावून घेऊन आपली सामाजिक बांधिलकी सिद्ध केली आहे याचीही आठवण यावेळी आपटे यांनी आवर्जून सांगितली.

खरे तर संस्थेच्या वतीने मागील वीस वर्षापासून अंध विद्यार्थ्यांना शिक्षणासाठी प्रोत्साहन मिळावे त्यांना शिक्षण घेताना अडीअडचणी येऊ नये या उद्देशाने शिष्यवृत्ती योजना सुरू करत असल्याची माहिती संस्थेचे अध्यक्ष अरुण भारस्कर यांनी मान्यवरांना दिली व विद्यार्थ्यांना वस्तीगृहात प्रवेश मिळाला नाही.

तर त्यांना शिक्षणाकरता अडचणी येऊ नयेत व त्यांना प्रोत्साहन मिळावे हा या योजनेमागचा उद्देश असल्याचे त्यांनी प्रास्ताविकात सांगितले. या कार्यक्रमात प्रति विद्यार्थी रुपये 2000 याप्रमाणे 145 विद्यार्थ्यांना धनादेशांचे वितरण मान्यवरांच्या हस्ते करण्यात आले.

लायन अभय शास्त्री यांनी देखील संस्थेच्या कार्याची प्रशंसा केली आणि लायन्स क्लब कोथरूडच्या वतीने सर्वतोपरी मदत करण्याचे त्यांनी आश्वासन दिले. माजी प्रांतपाल प्रशांत देशमुख यांनी देखील विद्यार्थ्यांना पुढील शिक्षणाकरिता शुभेच्छा दिल्या व रोटरी क्लब च्या वतीने अंध खेळाडूंना प्रोत्साहन मिळावे म्हणून मोठ्या प्रमाणात क्रिकेट स्पर्धा घेण्याचे आश्वासन दिले.

संस्थेचे आधारस्तंभ उद्योजक कृष्णकुमार गोयल हे काही वैयक्तिक कारणामुळे उपस्थित राहू शकले नाहीत. कार्यक्रम यशस्वी होण्याकरिता करिता अध्यक्ष अरुण भारस्कर, उपाध्यक्ष व्ही. बी. गायकवाड, राणी अहलुवालिया, रेचल शिरसाठ, रितेश सुराणा यांनी परिश्रम घेतले.