Pune Stray Dogs – शहरातील भटक्या कुत्र्यांच्या वाढत्या उपद्रवावर कायमस्वरूपी तोडगा काढण्यासाठी महापालिकेने २०२६-२७ च्या अर्थसंकल्पात तब्बल ३७ कोटी रुपयांची तरतूद केली आहे. महिला व बाल कल्याण समितीच्या ठरावावर प्रशासनाने सादर केलेल्या अभिप्रायातून ही माहिती समोर आली आहे. भटक्या कुत्र्यांचे नियंत्रण, नसबंदी, लसीकरण, शेल्टर उभारणी आणि पकड मोहीम यावर हा निधी खर्च केला जाणार आहे.

नगरसेविका वैशाली बनकर आणि अमोल बालवडकर यांनी महिला व बाल कल्याण समितीसमोर यासंदर्भात प्रस्ताव मांडला होता. भटक्या कुत्र्यांवर नियंत्रणासाठी स्वतंत्र व पुरेशी आर्थिक तरतूद करावी, अशी मागणी त्यांनी केली होती. त्यावर प्रशासनाने उत्तर देताना, यासाठी आधीच पुरेसा निधी राखीव ठेवण्यात आल्याने नवीन तरतुदीची गरज नसल्याचे स्पष्ट केले.

प्रशासनाकडून देण्यात आलेल्या माहितीनुसार, कुत्रा व मांजर नसबंदी शस्त्रक्रिया आणि लसीकरणासाठी ३१ कोटी रुपयांची तरतूद करण्यात आली आहे. तसेच, डॉग पाउंड आणि पशुवैद्यकीय क्लिनिक उभारणीसाठी १ कोटी २० लाख रुपये मंजूर करण्यात आले आहेत. भटकी कुत्री पकडण्यासाठी पाउंडची संख्या वाढवण्यासाठी स्वतंत्र ५ कोटी रुपये राखीव ठेवण्यात आले आहेत.

युनिव्हर्सल ॲनिमल वेल्फेअर सोसायटीच्या माध्यमातून एप्रिल २०२५ ते फेब्रुवारी २०२६ या कालावधीत १ लाख ४० हजार ८१ कुत्र्यांचे लसीकरण करण्यात आले. तसेच, रेबीजविषयी जनजागृती मोहिमेत २०९ शाळांमधील ६३ हजार ३७२ विद्यार्थी आणि २ हजार ६० शिक्षकांपर्यंत पोहोचल्याची माहिती प्रशासनाने दिली. सुप्रीम कोर्टाच्या निर्देशांनुसार शाळा, रुग्णालये, बसथांबे आणि रेल्वे स्थानक परिसरातील भटके कुत्रे पकडून शेल्टरमध्ये ठेवण्यासाठी शिंदेवाडी जकात नाका,

भूगाव जकात नाका आणि हडपसर येथील रामटेकडी इंडस्ट्रीयल इस्टेटमध्ये तीन जागा निश्चित करण्यात आल्या आहेत. या ठिकाणी बांधकाम आणि दुरुस्तीची कामे सुरू झाली आहेत. यामुळे भटक्या कुत्र्यांच्या नियंत्रणासाठी आवश्यक पायाभूत सुविधा उभारण्यास गती मिळणार असून, नागरिकांच्या सुरक्षेसाठी हा निर्णय महत्त्वाचा मानला जात आहे.