राजगुरुनगर :राजगुरुनगर शहरातील वर्दळीचा वाडा रस्ता सध्या हातविक्रेत्यांच्या अतिक्रमणामुळे वाहतुकीसाठी डोकेदुखी ठरत आहे. फुटपाथवर दुकाने थाटली जात असल्याने ग्राहकांची वाहने थेट रस्त्यावर उभी केली जातात. त्यामुळे पादचारी, दुचाकीस्वार आणि चारचाकी वाहनचालकांना अडथळ्यांचा सामना करावा लागत असून, शहरातील वाहतूक व्यवस्थेचा बोजवारा उडाल्याचे चित्र आहे.

फुटपाथ अडविल्याने पादचार्‍यांना नाइलाजाने रस्त्यावरून चालावे लागत आहे. त्यातच रस्त्याच्या कडेला होणारे अस्ताव्यस्त पार्किंग यामुळे वाहतुकीची कोंडी निर्माण होत आहे. ही परिस्थिती दररोजचीच झाल्याने स्थानिक नागरिकांमध्ये नाराजी वाढत आहे. विशेष म्हणजे, काही हातविक्रेत्यांकडून पथकराच्या नावाखाली पावत्या देऊन नगरपरिषदेचे कर्मचारी रक्कम गोळा करीत असल्याची चर्चा आहे. याबाबत अधिकृत माहिती स्पष्ट नसली तरी एकीकडे अतिक्रमण हटविण्याची कारवाई आणि दुसरीकडे त्याच हातविक्रेत्यांकडून पथकर वसुली होत असल्यास त्यामागील प्रशासनाची भूमिका काय, असा प्रश्न नागरिकांकडून उपस्थित केला जात आहे.

शहरात दिवसेंदिवस हातविक्रेत्यांची संख्या वाढत असून, काही नगरसेवकांच्या कथित पाठबळामुळे अतिक्रमणांना प्रोत्साहन मिळत असल्याचे आरोपही केले जात आहेत. याबाबत वारंवार चर्चा होऊनही हातविक्रेत्यांचे कायमस्वरूपी नियोजन, स्वतंत्र जागा आणि पार्किंग व्यवस्था यावर ठोस निर्णय होत नसल्याने नगरपरिषदेच्या कारभारावर प्रश्नचिन्ह उपस्थित झाले आहे. यापूर्वीही अनेकदा हातविक्रेत्यांवर अतिक्रमणविरोधी कारवाई करण्यात आली आहे. मात्र, कारवाईनंतर काही दिवसांतच त्याच ठिकाणी पुन्हा हातगाड्या व दुकाने थाटली जात असल्याचे नागरिकांचे म्हणणे आहे. त्यामुळे कारवाई केवळ तात्पुरती ठरत असून, हातविक्रेत्यांसाठी स्वतंत्र जागा निश्चित करून त्यांचे शिस्तबद्ध नियोजन करण्याची मागणी होत आहे.

दरम्यान, काही दुकानदारांकडून स्वतःच्या दुकानासमोरील अथवा आजूबाजूची जागा हातविक्रेत्यांना भाड्याने दिली जात असल्याचीही चर्चा आहे. एस.टी. बसस्थानक परिसरातील पाबळ रस्त्यावरही काही जणांनी स्वतःची दुकानदारी थाटण्याबरोबरच आजूबाजूच्या जागा भाड्याने दिल्याचे नागरिकांकडून सांगण्यात येत आहे. रक्षाबंधन, गणेशोत्सव, बैलपोळा आदी सणांच्या काळात वाडा रस्त्यावर थेट मंडप उभारून विक्री केली जाते. त्यामुळे रस्त्याची उपलब्ध रुंदी आणखी कमी होते आणि पादचारी तसेच वाहनचालकांना मोठ्या अडचणींना सामोरे जावे लागते.

जागा उपलब्ध पण…

नगरपरिषदेच्या हद्दीत मध्यवर्ती भागात काही मोकळ्या व सुस्थितीतील जागा उपलब्ध असतानाही हातविक्रेत्यांचे योग्य नियोजन झालेले नाही. शहराची वाढती लोकसंख्या आणि वाढता वाहनांचा भार लक्षात घेऊन दीर्घकालीन नियोजन करण्याऐवजी अधूनमधून कारवाई करण्यावरच भर दिला जात असल्याने शहराच्या बकालपणात भर पडत असल्याची नागरिकांची भावना आहे. तालुक्याचे महत्त्वाचे मध्यवर्ती ठिकाण असलेल्या राजगुरुनगर शहराची विस्कटलेली वाहतूक व्यवस्था सुरळीत करण्यासाठी अतिक्रमणमुक्त फुटपाथ, हातविक्रेत्यांचे नियोजन, स्वतंत्र पार्किंग व्यवस्था आणि प्रभावी वाहतूक नियोजनाची आवश्यकता आहे. अन्यथा तात्पुरत्या कारवाया करून पुन्हा जैसे थे परिस्थिती निर्माण होत राहणार का, असा सवाल नागरिकांकडून उपस्थित केला जात आहे.

 

नगरपरिषदेकडून अतिक्रमणाविरोधात कारवाई करायची असेल तर सर्वच टपर्‍या व पथारीधारकांवर समान कारवाई करावी. काही टपर्‍यांवर कारवाई करून काहींना अभय दिले जात असल्याने आमच्यात नाराजी आहे. नियम सर्वांसाठी समान असताना कारवाईत दुजाभाव का? आम्हाला हटवायचे असेल तर पर्यायी जागा द्यावी आणि सर्व पथारीधारकांचे योग्य नियोजन करावे. निवडक कारवाई करून आमच्या उदरनिर्वाहावर गदा आणणे योग्य नाही.

-एक पथारीधारक