बारामती : श्री सोमेश्वर सहकारी साखर कारखान्याच्या निवडणुकीत निर्माण झालेल्या तिरंगी राजकीय संघर्षाच्या पार्श्वभूमीवर राष्ट्रवादी काँग्रेसने आपली संघटनात्मक ताकद पणाला लावली आहे. अधिकृत पॅनेलची एकजूट, पक्षाची संघटनात्मक यंत्रणा, मित्रपक्षांचे सहकार्य आणि वरिष्ठ नेतृत्वाचा थेट सहभाग या माध्यमातून बंडखोरीला राजकीय उत्तर देण्याची रणनीती सुनेत्रा अजित पवार यांनी आखल्याचे चित्र आहे.
कारखान्याच्या निवडणुकीत विद्यमान अध्यक्ष पुरुषोत्तम जगताप यांनी स्वतंत्र पॅनेल उभे केल्याने राष्ट्रवादी काॅंग्रेससमोर स्थानिक पातळीवर नवे आव्हान निर्माण झाले आहे. मात्र, या आव्हानाला व्यक्तिकेंद्री संघर्षाचे स्वरूप न देता पक्षाची अधिकृत भूमिका आणि संघटित पॅनेल या आधारावर निवडणूक लढविण्याची भूमिका राष्ट्रवादी कांग्रेसने घेतली आहे.

सुनेत्रा पवार मैदानात; नेतृत्वाची थेट कमान

या निवडणुकीत उपमुख्यमंत्री सुनेत्रा पवार यांच्या सहभागामुळे अजित पवार गटाच्या प्रचाराला राजकीय वजन मिळाले आहे. सभासदांशी थेट संवाद साधत कारखान्याच्या भवितव्याचे प्रश्न मांडण्यावर पक्षाचा भर आहे. “सर्वांना सोबत घेऊन जाणे आणि कारखान्याच्या हिताला प्राधान्य देणे” हा संदेश प्रचारातून पुढे आणला जात आहे.सुनेत्रा पवार यांच्या सक्रिय सहभागामुळे केवळ उमेदवारांचा प्रचार न राहता ही निवडणूक पक्षाच्या संघटनात्मक प्रतिष्ठेशी जोडली गेली आहे.

अधिकृत पॅनेलभोवती संघटनशक्तीची मोट

राष्ट्रवादी काॅंग्रेसची प्रमुख जमेची बाजू म्हणजे अधिकृत पक्षसंघटना आणि स्थानिक पातळीवरील कार्यकर्त्यांचे नेटवर्क. कारखान्याशी संबंधित गावागावांतील कार्यकर्ते, पदाधिकारी आणि सभासदांशी असलेला संपर्क निवडणुकीच्या प्रचारात सक्रिय करण्यावर भर दिला जात आहे. निवडणुकीत वैयक्तिक प्रभावाबरोबरच गावनिहाय संघटन, मतदारांशी थेट संपर्क आणि प्रत्येक मतदारापर्यंत पोहोचण्याची यंत्रणा महत्त्वाची ठरणार आहे. त्यामुळे सुनेत्रा पवार यांच्या नेतृत्वाखाली राष्ट्रवादी काॅंग्रेसच्या कार्यकर्त्यांनी ‘पॅनेलनिहाय नियोजन आणि गावनिहाय संपर्क’ यावर भर दिल्याचे दिसून येते.

मित्रपक्षांची साथ; समीकरणाला व्यापक स्वरूप

अजित पवार गटाच्या अधिकृत पॅनेलला मित्रपक्षांचेही सहकार्य मिळत असल्याने निवडणुकीतील राजकीय समीकरणाला व्यापक स्वरूप आले आहे. राष्ट्रवादी काँग्रेससोबत शिवसेना (शिंदे गट) यांच्याशी असलेले राजकीय सहकार्य स्थानिक पातळीवरही प्रतिबिंबित करण्याचा प्रयत्न केला जात आहे.
त्यामुळे एकीकडे स्वतंत्र पॅनेल, तर दुसरीकडे राष्ट्रवादीच्या अधिकृत पॅनेलसोबत असलेली संघटित राजकीय ताकद, असे चित्र निर्माण झाले आहे.

‘अजितदादा’ नावाभोवतीही संघर्ष

या निवडणुकीतील आणखी एक महत्त्वाचा मुद्दा म्हणजे अजित पवार यांच्या नावाचा राजकीय वापर. स्वतंत्र पॅनेलच्या नावावरून निर्माण झालेल्या वादामुळे अजित पवार यांच्या राजकीय वारशावर आणि अधिकृत राजकीय भूमिकेवर दावा करण्याचा संघर्ष अधिक स्पष्ट झाला आहे. राष्ट्रवादी काॅंग्रेसने अधिकृत पक्ष संघटनेच्या माध्यमातून आपली भूमिका स्पष्ट करण्याचा प्रयत्न केला आहे. त्यामुळे निवडणूक केवळ संचालक निवडीपुरती मर्यादित न राहता ‘अधिकृत पक्षसंघटना विरुद्ध स्वतंत्र स्थानिक आघाडी’ अशा स्वरूपातही चर्चेत आली आहे.

स्थानिक नाराजीसमोर संघटनेची कसोटी

दरम्यान, पुरुषोत्तम जगताप यांच्या स्वतंत्र पॅनेलमुळे राष्ट्रवादी काॅंग्रेससमोर स्थानिक पातळीवरील नाराजी आणि व्यक्तीगत संबंधांचे आव्हान आहे. कारखान्याशी दीर्घकाळ जोडलेल्या नेत्यांचा प्रभाव आणि गावागावातील वैयक्तिक समीकरणे या निवडणुकीत महत्त्वाची ठरू शकतात. त्यामुळे राष्ट्रवादी काॅंग्रेससाठी पक्षाची ताकद मतपेटीपर्यंत पोहोचविणे, तसेच स्थानिक पातळीवरील मतभेदांना संघटनात्मक पातळीवर हाताळणे, ही प्रमुख कसोटी ठरणार आहे.